دلع ماسخ يأم سماح
محمد ضباشه
بتدلع دلع ماسخ
وأنا مش لاقى ياحماتى
واقول تفرج وفرجه قريب
تقولى أعزمنى فى الحاتى
أقول ماله طبيخ بيتنا
ومالها عيشتى يا مراتى
تدعى على اللى جوزها
وعلى كل أمواتى
تقول لحمه
اقول ممعيش
تقول فرخة
وربى مفيش
تقول فستان
ابات متهان
ومش راضية بحالتنا
ما سنين على كدا عايشين
وما حد دق باب بيتنا
همد ايديا يا حماتى
ولا اسرق واكون ظالم
والله ما أنا بخلان
ورب العباد عالم
رزقى فى دنيتى محدود
وبلدنا تعبانة
بلف طول اليوم
على لقمه عدمانة
وبشوف وشوش الناس
أقول أنا راضى
حالها ما يسر عدو
ودولاب المعاش فاضى
اعقليها يا ست الناس
وبلاش تهد العش
وعودى لنا راضية
وألاقى الفرح بان على الوش
بدل ما تكون حياتنا
غم او ماشية
غش فى غش
