صرخه اسماعيل أبو عمر: مثلث الديبة وتطويره او نسفه

إعداد/محمد شهاب

هذه رسالة من الفيس بوك فى  23/10/2017 على الحساب الشخصى للأخ اسماعيل ابو عمر Esmail Aboomar‎‏ مزارع أسماك بمثلث الديبه
بمناسبة إننا كمصريين بنفهم فى كل حاجة وبنفتى فى كل حاجة .وده أصبح العادى بتاعنا . عايز أوضح لأسيادنا اللى فوق
أولا : علشان تطور وتنمى لازم تكون عارف إن منطقة المثلث منطقة مركبة ومعقدة يختلف شمالها عن جنوبها وشرقها عن غربها . من حيث طبيعة التربة وطبيعة المياه. وده واضح من اختلاف و جودة أنواع الاسماك فى كل منطقة .
ثانيا: بسبب الطبيعة دى للمنطقة مجبور تتعامل مع كل منطقة على حدى يعنى تنظيم جنوب الطريق الدولى يختلف عن تنظيم شمال الطريق يختلف عن تنظيم منطقة الساحل .
ثالثا: ماينفعش واحد فقط مهما كانت قدراته يقعد على الخريطة ويمسك قلم ويخطط :-) ده اسمه تهريج . بإختصار محتاجين لجنة فنية من خبراء تقوم بالمهمة وتراعى المرونة فى التخطيط بحيث لا تضر بمصالح الناس . ولو مفيش خبراء مصريين يبقى عليه العوض ومنه العوض .ومش عايز انسى الاستعانة بخبرات أهل المهنة سواء صيادين أو أصحاب مزارع فأهل مكة أعلم بشعابها . وده مش عيب ولا حرام
رابعا: العلم مافيش فيه أوامر عليا ومصالح الناس وارزاقها مش لعبة فى أيادى اى حد . وسوف تسألون . بالعربى لما تسمع الغلط لازم توضح الصح وبلاش تخاف على الكرسى لانه زائل لا محالة .
خامسا: الهيئة العامة لتنمية الثروة السمكية لازم تحدد اهدافها هل هو التربح أم التنمية وده علشان تقدر تتحرك صح. أفضل من التخبط والبهدلة وقلة الحيلة اللى واضحة جدا عليها.
سادسا: الكلام للناس اللى فوق وبيحبوا البلد بجد . منطقة مثلث الديبة ومزارعها مشروع قائم بالفعل وبينتج بالفعل ولم يكلف الدولة مليم واحد و بيدخل للدولة فلوس .على عكس مشايع اخرى تكلفت مليارات من ميزانية الدولة ...ياريت بلاش ترعبوا وترهبوا الناس اكتر من كده وسيبوا الناس تشتغل وتعيش .
سابعا:تذكير للمسئولين الكبار جدا بما قالوه ( نحن دولة قانون . دولة محترمة تحترمة عقودها )
اسماعيل ابو عمر