هل أستخدم أعلاف رخيصة او الغذاء الطبيعى و بدائل الأعلاف أقلل التكلفة؟
إعداد/ محمد شهاب
Abd El-Rahman A. Khattaby #مزارع #أسماك #خطابى #Khattaby
بوست طويل شوية لكن لتكرارلسؤال أظنه سيكون مفيد لمزارعى الأسماك.
بعد غلاء الخامات وإرتفاع المدخلات الإنتاجية فيه سؤال ديما بتسأله من زملائي مزارعى الأسماك هو نابع من بحثه عن توفير جزء لتعويض وتحسين العائد من الأسماك.وطبعا لأن الأعلاف دائما هى المتهم الأول في نظر مزارع الأسماك " والكلام ده من ساعة لما كنت طالب فى الجامعة أى منذ أكثر من عشرون عاما" ودائما المعوق الأول هو الأعلاف وله حق فى النقطة دى لأن الأعلاف بتمثل حاليا 60% تقريبا من المدخلات وكانت بتمثل قبل كدة 70 % قبل غلاء باقى المدخلات الأخرى" الأرض ، الطاقة، العمالة، المدخلات البيطرية.....وخلافه".
السؤال هو هل أستخدم أعلاف رخيصة او أستخدم الغذاء الطبيعى والأعلاف الكبس و ما يطلق عليه " بدائل الأعلاف" للتغذية علشان أقلل التكلفة؟
هل أقلل الكثافة فى مساحة الأرض بتاعتى؟
تعالوا نجاوب على كل هذه الإستفسارات فى بوست معلش طويل شوية لكنه يوضح بعض الحقائق.
أولا : علشان تقلل التكلفة إبحث عن الأجود يعنى ايه الأجود
للتوضيح هادى مثال بسيط :
طن العلف 30% وصل 13.5 ألف تقريبا وده رقم كبير فهافترض ان قصادى شركتين .
الشركة A معدل تحويل العلف بتاعها جيد والعلف حوالى 1.2 يعنى كل كيلو سمك بياكل كيلو و 200 جرام علف تقريبا
الشركة B معدل التحويل بتاعها حلو بس أعلى برقم بسيط جدا عن الأولى يعنى 1.3
بالورقة والقلم الشركة الأولى A طن السمك بتاعها اتكلف علف حوالى 16200 ( ستة عشر ألف ومائتين جنيه).
الشركة التانية B طن السمك بتاعها أكل علف بحوالى 17550 ( سبعتاشر ألف وخمسمائة وخمسون جنيها) .
يعنى كل 0.1 زيادة فى نسبة التحويل قابلها زيادة فى تكاليف الإنتاج حوالى 1350 جنيه ( ألف وثلاثمائة وخمسون جنيها).
طيب الشركة B عملت عرض خصم 200 جنيه على كل طن ( برضه تخسر) حتى لو العرض وصل إلى ألف جنيه.
ابدأ بس أفكر اسيب الشركة A واتجه الى الشركة B لو اعطونى عرض خصم 1350 جنيه . ساعتها أفكر ( لسه مأخدتش القرار ) لازم ابص الي العلف وجودته في المياه وتاثيره عليها اللي هاياثرلي بالتبعية علي زيادة استخدام المكن والمدخلات البيطرية.
تعالى أبص لنقطة تانية سرعة نمو أسماكى . النقطة اللى محدش بيعمل حسابها.
حوض السمك عند حضرتك زى خط الإنتاج فى المصنع المفروض السمك يستوى يطلع على البيع مباشرة حتى لو السعر منخفض شوية لأن بإنتظار تحسين السوق أنا بصرف علف وقلبى وعقلى خايفين على السمك لأن الفترة دى الكثافة السمكية فى الحوض بتبقى على أعلى مستوى ولذلك إخراج السمك بشكل أو بأخر هو تجنب للمخاطرة .لو السمك مات منه 20 % وشوية علف كمان حطيتهم فى الحوض يعنى كل طن سمك تقريبا حاياكل بحوالى 500 جنيه يوميا بكدة أنا بخاطر بشئ مفيهوش مكسب كويس.
طيب السؤال التانى اتجه للغذاء الطبيعى وما يسمى ببدائل الأعلاف ؟
هابدأ بالجزء التانى : لا يوجد ما يسمى بدائل الأعلاف ( على الأقل اعتقادى انا) بل مادة خام اقدر استخدمها كبديل أرخص وده بيحكمنى فيها تركيبها الكيميائى وشكلها الفيزيائى ومدى تحويلها وبكده أقدر أحسبها وأقارن بينها وبين العلف زى ما قارنت فوق.
طيب الغذاء الطبيعى: لن نستطيع التوقف عن إنتاج الغذاء الطبيعى فى الحوض ( هو أصلا موجود) ولكن لأن العلف يعتبر مركز بروتينى متكامل بيغطى كل الإحتياجات فبيبقى معدل نمو الأسماك منه أسرع وده بينعكس على قصر فترة التربية ( هاتقلل معايا تكاليف الإيجار، والعمالة وتقليل المخاطرة.....)، كذلك الغذاء الطبيعى تركيزه فى الحوض بياثر وبيتاثر بجوده المياه، لابد انى اخد بالى من جودة المياه كويس . ودى نقطة من ضمن نقاط اختيارى للأعلاف . مجبش علف يلوثلى المياه ويزودلى معدلات الإخراج وينتجلى الأمونيا اللى هاتأثر على صحة الأسماك وبالتالى تزود معدلات التغيير او الإضافات البيطرية فى الحوض وبالتالى إنتاجى هايكلفنى أكثر.
الأسماك اللى متغذية على الطحالب فترة كبيرة طعمها بيتغير وكمان بتبقى سمكة طويلة ضهرها مش مليان فبرضه هاتيجى أخر الموسم تغذيها على الأعلاف وحاول تختار الأجود.
دلوقت فيه أعلاف للزريعة بتساعد على تقصير فترة التربية وتمد أسماكك بالإحتياجات التغذوية كلها.
السؤال الثالث : هل أقلل الكثافة ولا أزودها .
الإجابة ببساطة أضبط الكثافة على حسب سعة المياه البيولوجية عندك وحاول تجيب أعلى كثافة تقدر عليها مع المحافظة على جودة المياه فهى العنصر الأساسى قبل التغذية كمان.
يعنى بإختصار
* إهتم بجودة المياه فهى العنصر المحدد لصحة الأسماك.
* إستخدم الأعلاف الأعلى جودة.
*إستخدم الحجم المناسب من الأعلاف علشان تساعد سمكك ياكل براحته.
* إهتم بجودة منتجك من الأسماك.
*حاول تطلع من الحوض أعلى كثافة تقدر عليها بدون التأثير على جودة المياه علشان تجيب عائد أعلى بنفس التكلفة التشغيلية.
متأسف لطول البوست
ساحة النقاش