ذكريات عاشت في بالي
من زمااااااااان
زي صورة اتزينت
فيها الحيطاااااان
كان معايا ربابة تعزف 
اللحن بهداوة
كان خيالي حصان بيرمح
و ف عنيها كتير شقاوة 
نسبق العقل المُخير
نخلق الحدوتة تركض
ناحية الحلم الصُغير
ناحية العمر اللي جاي
ننسى أيامنا السقيمة
نلعب اللعبة الحميمة
والخيال يملا عيونها
طير يرفرف في سماها
نجم ساكن في سماي
يلقى جّوة قلوبنا سُكنة
القى جوا عيونها فرحة
نقسم الأدوار ما بينّا 
انتي فرح البيت حبيبتي 
وقلبي ليكِ سند ومأوى
انتي راضية باللي عندي
نور عنيّا من جبينك 
واللي ما بينا بيسوى
تبدأ الأوتار تغني 
والنغم بيزيد حلاوة
والجميلة عيونها مالت
تبتدي اللعبة بهداوة 
جنب بيت الحب
نسرح في الخيال
قلبي غرفة نوم وقلبك
يبقى غرفة للعيال
والسرير فرشة حصير
والكراسي والدولاب
كفي مسند قلبي باب
أما لما نحب ناكل
نخبز العيش بالتراب 
نجمع الطوب م الشوارع 
نقسم اللقمه ما بينا
أنزل الصبح لشغلي 
نيجي آخر الليل ونسهر
والفرح في القلب يكبر
كل يوم ع الحالة ديّة 
عكس كل الناس حياتنا 
الليالي دي بتاعتنا
يومنا غير الكون
وليلنا..........
ليه نهار حلم الصغار
مرت الأيام نهااار
ع العروسة والربابة
إلا مرة شافنا صدفة 
إبن الجيران
واد سئييل وكان جبان
حب يدخل في الحكاية
غصب عني
ياخد اللعبة وياخد
قلبي مني
نفسه ياخُد
دوري قدّام الجميلة
إيد حبيبتي في 
حُضن إيدي
دمّها ممزوج بدمي
نبض ساكن فى وريدي
وف عيوّني بان وعيدي
غصب عنه ....
خدت من ايده الربابة
قلت له بطرف اللسان
في حكايتنا مفيش مكان .
لشخص تالت
من كسوفه عيونه 
راجت بالدموع
والغضب مالوش رجوع
راح بسرعة لسانه فالت
والبراءة ف قلبه ماتت
قال لابويا
و قال لابوها
شدو إيدي
و جرجروها
هددوني وخوفوني
وخوّفوها
قطّعوا لبس العروسة
كسّروا منّي الربابة
جوّة منديلي داريتها
بالدموع والذكريات 
مهما عمري بيّا عدّى
والزمان عليّ فات
كل حاجة عندي ترخص 
إلا هي َتزيد غلاوة
مهما طعم الدنيا مرّر
أو في وجهي الكون يغَيَرْ
والعقول تزداد غباوة 
والقلوب ضلمه وقساوة
مهما الاقي الكون أناني 
أو في بير غدره رماني
أفتكر دايما ربابتي
ولعب أيام الشقاوة 
آخد الأحلام ف حضني 
وافرد المنديل و اغنّي
كان في يوم ليا حبيبة
عايشة فيني
وجزء مني
لكن الايام بتغدر
وكل يوم بتئسى اكتر
والدموع غلبت عيوني
غصب عني
ذكريات عايشة ف ضميري
وحتة مني....
‫#‏عمر_محمد‬
عامية مصري