مَلِيِت بِعادك في السفر بقي كُل حاجة بالريموت
وأنا عَ السرير نـــايم صِـحيت أو حـتي أمــــوت
أهي مُفردات تتساوي عَندي لَمَا بيطول الفُراق
صَخب الحياة صوت البشر مبحسهوش
كل الضجيج والإزدحـــام مبسمعــــوش
كل العقارب في الساعات متجمدين ميلفلفوش
حتي رحلات السفر مبيبتدوش ولا يوصلوش
حالة خلل رعشة وبلل وأنا مِشتعل بالإختناق
صوتي كأنه أزيز بيبان متحشرجة
لحني القديم المُنتشي مالهوش رجا
أصبح نشاز بيتي القزاز اتكسرت فِـيه الشموع
نِزلت ما بين العَــــتمة مِــن عِـــينُه الدمــــوع
اتفتفتت كل الصور المحطوطين م الرجرجة
حتي التُحف والأنتيكات اتكسروا م الإشتياق
وخرجت وحدي ع الطرق يمكن أشوفك
يمكن كفوفي البردانين تلمس كفوفك
يمكن في لحظة ألتقي قلبي قصادي
وفضلت أنادي والفراق عَمال يعادي
والحلم عندي نِلتقي تسمح ظروفك
نِزل المطر مليان أنين بَل الشوارع بالفراق
وأتاريكي لسة مصممة واخدة القرار
تِرحل عيونك تختفي يمشي النهار
والضلمة تُسكنني أنا م الإنتـــظار
وهدوء سخيف بيهزني عامل حصار
تعالي ياللا بلاش كدة كُلي ألم كُلي اشتياق
ــــــــــــــــــــــــــــــــــــــــــــــــــــــــــــــــــــــــــــــــــــــــــ
بقلمي \ عصام مدين .