( بدون مونتاج )
ـــــــــــــــــ
فى نهاية رحلة عمرى الدنيا 
وانا راكب
فوق صهوة نعشى
وباعدِّى لأول ليلة
فى عمرى الأزلى
بااتخيل !!!
ترجع بى الدنيا!!
واقعد فوق الريح وبساطه
وأطل على العالم وحاجاته
بااتخيل.........
لو فى إيديا العدسة
..........بترصد 
هذا الكون الضيق 
..........جدا جدا
وف آخر لقطة بدون مونتاج
أتفرج
فاتفاجأ إنى
باشوف العالم هوّا العالم
فيه الظالم هوّا الظالم
فيه الناس بتدوس الناس
فيه الكون من غير احساس
قلبى يطير م الخوف على ناسى
آخد مقطع أفقى ورأسى
تطلع بلدى من ع الخارطة
ألقى الورطة هيّا الورطة
ناس مسطولة بتشرب بوظة
بوظة تنسِّى مـر العوزة
والأراجوزة مثلا أعلى
قلبى يطير م الخوف على ناسى
آخد مقطع أفقى ورأسى
تطلع من ع الخارطة الصحبة
فى الصبحية........
......... حفلة فول
والصحفية .........
......... لسان معسول
إقرا الحادثة
عمارة الموت
واللى يبلضم 
......... بالنبوت
يحرم شُرب المية 
................... القوت
قلبى يطير م الخوف على ناسى
آخد مقطع أفقى ورأسى
ألمح لقطة على إحساسى
ألقى الناس عنى مشغولة
شايفة الشعرا عقول مخبولة
تحلم بمداين ويوتوبيا
وفضيلة ونرجسة 
.................... وزنوبيا
أحزن جدا على إحساسى
وآخد نفسى واروح بالعدسة
................ النادى الأدبى
ألقى النادى
راح لعرابي
سـكن القهوة
براهيم حامد
........يلعب طاولة
وابن عطـية
......... لا قوة لا حولا
م الزقازيق على أم الدنيا
عايز النادى يعلا فى ثانية
وابن مصيلحى
.............. بحسن النية
عاشق فى دروب العامية
أحزن جدا على احساسى
واترك ناسى والم الخارطة
واعرف إنى وقعت فى ورطة
وان العالم هوّا العالم
فيه الظالم هوّا الظالم
فيه الناس بتدوس الناس
فيه الكون من غير إحساس
فاانزل من على صهوة نعشى
وافرد ضهرى.......
.................وافرش فرشى
وادخل رحلة 
................... عمرى 
........................... الأزلى
شعر / حامد الغزالي يوسف