نفحات من شعرالعامية المصرية

مدونة خاصة بالشاعر : حمدي محمد حسين ..

‏١٠ سبتمبر‏، الساعة ‏٩:٥٢ ص‏ ·

 وداع...

.................

.وفضلت أدور عليكي يا سنة 70
واكر في التواريخ
والذكريات صواريخ
ريحة الطفوله مرح
عزف الكمنجة 
علي وتر الأمل بساتين
طين الجناين ..وجني التين 
النارخ المر
والبلح والطير 
ونسايم الخير 
والبخور جاوي
مولد ياسيد ..
ولعبة الموت 
والبنت واللمبه 
والسرك والحاوي 
ونسان وعايش في السنين فاصل
خالتي أم سيد نجف بينور الحاصل 
والفرن والجرن والدقيق والسمن
ولمة العيله والعيال واللعب
والدق بالكعب ..والخطيب والشيخ
زمن القروش والشلن والريال فضه 
و7خطاوي من فوق الورق والنار ورشة الميه للرقوة م الخضه .
طبل الصغار ع الصفايح
والقمر مخنوق 
والعالم المختفي في موسم الزعابيب
جبانة الخوف والرعب من العفاريت 
والجده والحواديت ..
ضرب الحزام والحبل وطبطبة امي 
وزعل ابوي مني ..يوم غبت م الكتاب 
روضة الكنيسة ..والميه والقربان 
النابت/الحمص ..والفته في المولد 
ورجمنا المجذوب بالطوب كإنه شيطان 
ربع الرغيف رغفان 
والتلج نازل م السما حجارة 
تفتح نفوخ الزمن 
والعمر و الرحلة
ورق النتايج سقط 
يا لعبة الأيام
بكوة فراق الحبايب ..
والزمن والدار
بيتنا القديم والأوضه والشارع
رجعة صدي الصوت 
والموت كآنه شبح
بيرص في العايشين 
والدور علي مين ؟
الدور على مين ...؟
على حضن أبويا جريت 
طبطبت علي كتفه
وهمست في ودانه 
وقلتله يا ريت ......... 
سهيته ..غفلته
أخدت من جيبه
فتحتله قلبه
رجعتله مهره
سهاني مره زمان 
ورماني في الدنيا 
سهيته في التانية 
رجعت نطفه في سلسلة ضهره .
...........................


شعر : حمدي حسين

المصدر: بواسطة حمدي محمد حسين
hamdybegad

حمدي حسين

  • Currently 0/5 Stars.
  • 1 2 3 4 5
0 تصويتات / 14 مشاهدة
نشرت فى 17 سبتمبر 2018 بواسطة hamdybegad

ساحة النقاش

حمدى محمد حسين

hamdybegad
.. مدونة خاصة بالشاعر/ حمدى محمد حسين .. محاضر وشاعر مركزي معتمد لدي وزارة الثقافة المصرية »

ابحث

تسجيل الدخول

عدد زيارات الموقع

4,973