نفحات من شعرالعامية المصرية

مدونة خاصة بالشاعر : حمدي محمد حسين ..

 

فرح
.......
كانوا الغوازي زمان 
بيرقصوا الأفراح ...
ويلموا ناس البلد 
زي الفراش ع النار 
قلب الحريم يتهري
والغيره تقتلهم
هوجة .. لتاني نهار ..
كلمة غزيه..
من غزا .
وقع السبيه العار ..
و في التاريخ 
ثورة ..
ثورة علي الخوف ..وع المألوف
ثوره علي الغيط ..علي السخره 
علي الشقا والغلب ..
على حبسة الدوار
وأما بشير البلد 
يعلن عن الفرحه 
تلقي ابتسامة الرجال 
ع الوشوش طارحه ..
اتكحرت يا لمون واتكسر يا قزاز 
جبنا خلق الطهور عقبال خلق الجواز
يرن كاس المحبه ..وتتملي الاقداح
بعد الشقا ..الملتقى
ف الساحة تحت اللبخ
إقلع تياب السبخ ..
وتعالى يا فلاح .. 
الليله ليلة مرح ..
امسح أزى الكرباج
والحب يجمعنا 
ليله ف ليالي العمر ..معدوده 
شبعنا عدوده .
من غروب الشمس ..
لما يطلع علينا صباح .
رحت الفرح بالليل 
وفاكر الدنيا هتروقلي 
السكر قالي :
يا ولد الناس هتفوقلي ..
ما كانوش زمان بيبصوا ع الصورة
كانوا زمان بيغوصوا ف الأرواح. 
....................

شعر: حمدي حسين 

hamdybegad

حمدي حسين

  • Currently 0/5 Stars.
  • 1 2 3 4 5
0 تصويتات / 9 مشاهدة
نشرت فى 8 يوليو 2018 بواسطة hamdybegad

ساحة النقاش

حمدى محمد حسين

hamdybegad
.. مدونة خاصة بالشاعر/ حمدى محمد حسين .. محاضر وشاعر مركزي معتمد لدي وزارة الثقافة المصرية »

ابحث

تسجيل الدخول

عدد زيارات الموقع

5,096