نفحات من شعرالعامية المصرية

مدونة خاصة بالشاعر : حمدي محمد حسين ..

 

بشارة ....

 

ابوي كلمني في التليفون 

وهناني بعيد الأم ..
ما جابشي سيرتها ولا مره 
عشان جرحي
ما يتفتحش في معاده ..
كما الأرهار ..
في كل ربيع .. وينزف دم .
ما هو عارفني 
وعارف هو ..
كام هي..
فاتتلي من جبال الهم
مكالمة ابوي
دعا ليا ولولادي 
لكن احساسي بالدعوه
في هذا اليوم . 
ماكانشي دعاه دعا عادي
ما كانشي بيطلع السموات 
عشان ينزل ..
ولا كانله طريق أو درب 
من باب الحنان للقلب 
من طرف اللسان تطلع حروف القول 
تطبطب فوق حنايا الروح 
ترياق الشقا والغلب.
مكالمة ابوي 
كان ليها معاني كتير 
شريط بيمر في وداني 
ووز ابيض 
نزل في الترعة ..يتوضى 
زمن عدا ..
شلن فضة ..
وقطن ابيض رجع للغيط 
بعد اما بلي وصدا 
مكالمة ابويا 
زمزمنا ومغزلنا
وماء الوجد
خيوط النور 
ولون الورد عوه موزعة ع الناس 
قمر وناس وكان سهران
بيرعانا ويقرالنا الصمد والورد 
جسد شقيان من الحرمان
بيغزل لينا توب فرحه 
ما نحتاجش ساعتها لحد
مكالمة ابوي ..
سماحة ودين 
ركوع وسجود
وتكبيرة صلاة القرب 
مكالمة ابوي 
اشارة.. امي بعتاها 
رسالة حب 
مكالمة ابوي 
بشارة رب .
.....

ابنك : حمدي محمد حسين 

المصدر: حمدي محمد حسين
hamdybegad

حمدي حسين

  • Currently 0/5 Stars.
  • 1 2 3 4 5
0 تصويتات / 51 مشاهدة
نشرت فى 17 إبريل 2018 بواسطة hamdybegad

ساحة النقاش

حمدى محمد حسين

hamdybegad
.. مدونة خاصة بالشاعر/ حمدى محمد حسين .. محاضر وشاعر مركزي معتمد لدي وزارة الثقافة المصرية »

ابحث

تسجيل الدخول

عدد زيارات الموقع

12,166