نفحات من شعرالعامية المصرية

مدونة خاصة بالشاعر : حمدي محمد حسين ..

 

 

سلام سلاح

...............

يا نملتي ....

وطنك قرييب من هنا

إيه يعني تمشي كام سنه ....

يا خطوتي ....

تعبوا الجيوش والكشافين قطعو النفس

نامت حكاوي جدتي ..وانا لسه صاحي

والسبب ....

نفس السؤال اللي زرع ف مخدتي صوت الغراااب

يا ام الزمن ....

انا لسه سامع كلمتك :

_ الدايره لازم تكتمل ..

_ والخطوه توصل مداها .

والألف آهه وآهه يا امه

مين اللي غناها ؟؟!!

الحيره ولا السؤال اترج ف حشاها ؟؟!!

تواهه بينا الطريق يا امه

والسكه ضلمه ..لكين الخطوه عشقاها .

لساكي بتقوللي يا امه  ..؟

_ ايوّه لسه باقول ولسه ياآما هاقووول :

_ طول ما فيه ف الجو طير الدنيا لسه بخير .

_ والخير سنابل ....

سنابل .. سنابل .. !!

بس القنابل هيّ اللي بتهد الخلود.

_ واحنا بنينا السد من غير يد ممدوده .

يا امه .. المدافع هيّ اللي بتعلّي السدود

        الحرب والقوه هما الوجود ع الأرض

_ الحرب هيّ " الدمع " ..هيّ " الموت "يا ضنايا ..

_ لو تفوت ع المعبد المنحوت فى بطن " المجد "

_ راح تعرف ..إن القوة هيّ " الجمع " هيّ " الصوت "

قولتيلي يا امه .. وياآما قولتيلي : بكره هنعدي

بكرّه هنعدي.. بكّره هنعدي.. بكرّه هنعدي.. بكرّه هن.......

_ أيّوه هنعدي ...

يا امايا كفايه كلااااام ..شبعنا بزياده .

لسه الحنة ف إيديكي ..لسه الشمعة منقادة ..؟!!!!!

_ أيّوه هنعدي يا ولدي ..وبكرّه بيني وبينك..

_فينك.. أدينا عدّينا .

وسلاحنا ف إيدينا يا امي ..سلاحنا ف إيدينا

بالضرب.. بالحرب ..بالدم ..بالموت ..

فوق الهم عفصنا وخطينا ..

مش بالشمع يا مسالمه

يا ام الفؤاد برسيم

عمر النسيم ما يملى نني الصدر

_ غير بعد شق الأرض بالفاسه

تطرح شقايق ..

_ وريحة عطر نفاسه

تغسل نجاسه

_ كانت بتأذي الطير

وبتخنق حمام القلب .

أيّوه عدينا

_ أيّوه عدينا ..وسلاحنا ف إيدينا ..يا ولدي

سلاحنا ف إيدينا .

_ واحزانّا لقيت طريق الفرح لعنينا .

أنا مش مصدق يا جنة مصر ..دم النصر ف إيديا

_ بلاش الدم يا ولدي ..بلاش الدم .

سامحيني يا صبّاره ..

يا كبّاره..لمّي خواتي حواليا

حاوطيني في يوم الفرح

انسي الجرح

إقري الفاتحة على روحي

ضميني قوي يا امه .

وقولي كان .. إبني بطلّ .. بملّو البقّ

علّي الصوت قوليها ..وافرحي بيها

وأمانه يا امه ..أمانه يا امه

تخلي حمامك البنّي يغنّيها:

سماح سماح ..يا ام البطل ..الفجر لاح

والشمس طلعت ..والقمر ..فرد الجناح

والبت لبست قصب ..       بعد الجراح

وحياة.. غلاوة الولد .. وعيون صباح

سلام سلاح يا بلد ..

               سلام سلاح ..

         ...........................................

        شعر/ حمدي محمد حسين 

 

 

 

 

 

 

 

 

 

 

 

hamdybegad

حمدي حسين

  • Currently 0/5 Stars.
  • 1 2 3 4 5
0 تصويتات / 129 مشاهدة
نشرت فى 21 إبريل 2017 بواسطة hamdybegad

ساحة النقاش

حمدى محمد حسين

hamdybegad
.. مدونة خاصة بالشاعر/ حمدى محمد حسين .. محاضر وشاعر مركزي معتمد لدي وزارة الثقافة المصرية »

ابحث

تسجيل الدخول

عدد زيارات الموقع

12,168