القطر بيزمر فى ودن العيد ..

....................................

القطر شبك مشواره فى جلبيتي

شديتها شبك ..

ع الكتف رميته

ولملمت بقيتي

ورجعت لبيتي فى آخر الليل

مرتاح البال ..

الرزق قليل ..لكنه حلال .

لو اغمض عين ..أغرق فى النوم

لو افتّح عين ..

أفرد درعاتي وهاتك عوووم

طولك يا نهار .

ويهون المشوار المشوار .

مع أول خيط أبيض م الفجر

لفيت الدنيا ف منديل ..

ع الكتف رميته

ابسطها يا باسط ناديته

الناس عريانه ..والموسم عيد ..

وانا حاسس لسه بعيد العيد وبعيد التوب .

وسط الهلاهيل ..

الخلق يا دووب شايلين قرشين ..لجل العياييل

شقا قول شهرين ..أو قول سنتين .

دالبحر بخيل ..والرزق قليل .

ولا قادره الناس تشتري حاجه

مع ان بلدنا بقت حاجه ومش محتاجه

لكن بتبيع ..

ويقولوا قال ايه الدنيا ربيع

يا سلام ..

فرشولنا الأرض غناوي كلام

مش برضو حرام

أرجع مكسور ف القلب عياط ..وف حواديتي .

وبدال م أبيع ..

من جيبي أقطّع للخياط ..

 رقعه ..  يرقعها ف جلابيتي.

أنا شامه شياط

أنا شامه شياط

أنا سامع أمي هنااااك

ف بلدنا هناااك بتقول :

أنا شامه شياط

والقطر أهو داخل ع العياط

وانا ريتك رؤيا العين يا أمايا .. في صحن الدار

عماله ترصي العيش ف الفرن نهار

لا العيش يا أمايا بيخلص ..ولا خمدت نا ر

غمضت عنيّا يا أمي شويه

وسرحت شويه ..

فتحت لقيتني ف وسط النار والقطر سريع والناس عماله تنط شرار

القلب ال كان بيحن لأمه لابوه لصغار

اتفحم / مات .. علي دكة قطر الموت / التنين التنور  

وكإن نفير القطر يا أمي ده صوت السور .

كل أما القطر بيصرخ توووووت

عشرات بتموت .

كل أما القطر بيصرخ توووووت

عشرات بتموت .

وبيوت وبيوت ..

لفظت أولادها علي السكه .

أفواج أحزان ..ونفس مقطوع ..

بيغني ولادي ولادي نشيد

وحشانا يا أمي

يا ساكنه بعيد

وخلاص هانت

خلاص هانت

والقطر بيزمر في ودن العيد .

..............................

شعر / حمدي محمد حسين