.

صوتك ..

...................................
خلى تونك قد سمعي
هافهمك ..
والكلام يسرح لقلبي 
والرموش هتقوم تنفض لك مكانك
تبقى جنبي ..
وان مشيت ..
وغرقت فى الشارع وهمه
وكل طوب الأرض ده اللى لسه لامه
أبقى لوم نفسك ..
وحاول ..
تربط الشارع بشاشك
تلحق الغرقان فى دمه.

حس بالناس اللى كاتبة ع التكاتك
مشكلاتها .. أمنياتها ..معطاياتها
حكمة الدنيا اللى بتبرر سكاتها

وانت قاعد ع القهاوى
ملِّى عينك 
قول لحمال البخور
الله يعينك

قول لبياع العطور
واحشنا ..فينك.

قيس عل صابعك قزازه
..واشتريها
حتى لو مكانتشى فيها
ريحة الأحباب.

لمع الجزمه القديمة أم جلد تراب..

واتعجن فى الناس..
هتفرج .
بس دفي البرد
حس الناس
ولو فى اشاره
جالك واد بتاع مناديل
متكسفهوش
وخد منديل ..هتحتاجله
هتمسح بيه دموع الورد .

ولو فى القطر
فيه كروان . 
قرالك أية أو موال
ما تصرفهوش 
ده محتاجلك 
ومن فضلك 
حاسب لينا ع المشاريب
وسيب .. فى جيوبنا
راحة البال

شعر : حمدي حسين