(1)
عمرانه مصر بزرعها ونيلّها
وجيل يسلم كلمته لجيلها
وان قولتلى ارسمها 
مش رايح أعلى الضى

يحرقها

ولا رايح اخلي الظل

  قنديلها

وحياة قمرها ..البدر

وسر خير الأرض

ما نا رايح  أوطى غير

أبوس جمايلها  .

ويجعلوا عامر

نتغدا فجل وخس

نتعشا خبيّزه

جميزه تجمعنا

نتلم في السامر

 
والفحم لو  ينقاد

تحضر الأعياد 
ندفا في أحضانها

ونغني لوطنّا

وتغني لوطنّها 

بخفه تترقص

ونميلوا على ميلها
دا الكحله لعنيها
والحنه لو باتت
هتجيب سواد ليلها
مكتوبلى اغنيلها

عمرانه مصر

 بزرعها ونيلها

..............................................

(2)
<!--[endif]-->

الله..  الله.. الله.. الله

محروسة مصر بأولياء الله
مصر اللي من قهرها تنده 
تقولك : آه
درويشه عايشه فى كوخ 
معشوقة و عشيقها
لا البرد يغلبها
ولاحرها تعبها
مولد ورا مولد 
دايره على كعابها
وإذا ضناها الفكر
تنزل ساحات الذكر 
وآهِ آهٍ آه

 لما حبيبتي تهيم
صوتها كما الترانيم

والحلو عنابها
مره تقول : الله
ومره ولدى تاااه 
يا بلداااه

يا ولداااااه

محروسة مصر بأولياء الله

.....................

 (3) 
محبوسة مصر ومين يعدّيها ..؟
وإتنين غيلان مستفردين بيّها.
ع الشط دا هما 
ع الشط ده دولا..
لمين تسيب يدها ..؟
وهى طول عمرها 
لايمين ولا شُولا
ياعم سيب توبها
 أنا اللى كنت ..باقول :
وشوف جمال ذوقها
غطّتني ليلة البرد

ورمت عليا الورد

ودعتلي من قلبها

وحننت ربها
وانا اللى من ثورتين 
لسه معرّييها

محبوسه مصر

 وميييين يعديها ..؟

................................

 (4)
مقسومة مصر .. لجنوبى وشَمالى 
وحَضرت فرحُه بشوق

 ما قالّى عُقبالى
وابن الصعيد آنى ..

والفُرّقة وجعانى 
وازاى تقولّى يا ابوى
ولد الصعيد أصلى 
و ازاى تقول على اخوي 
ده قشره برّانى ..
يا ولد ابوى .. أ رّب
قرّب هنا جنبى 
نقلع ونزرع دووم
أرضك وليك جَرّب

تسعد حياتك دوم

دول هملوني دهور
للدود نخر جنبي
وما عدت قادر أتور

تح الشادوف م الخوف

ما تقلشي أنا مالي
وعبي واملالى 
دانا اللي جيت فرحك 

من غير ما تدعيني
ولا هان عليك تنطق

وتقولي : عقبالى ..

مقسومة مصر ..

 لجنوبي وشمالي

...............................................

الجنوبي : حمدي حسين