موال الثورة

يا ليل.. والبحر بالليل ..  غير البحر في الناير
والثورة في يونيو ....... غير الثورة في يناير

..............................................

عارفه ..نفسي أفاجئ كل اصحابي ..برؤية جديدة
زاوية جديدة
بقالي سنين مش فاهم حاجه
ما كتبتش حاجه
ولا محتاجه الدنيا قصايد تانى
شهيده ..

الفكرة/ النكرة
اللى انا مش عارف أرسى عليها

البر
اللي انا مش قادر اشوفو
السرك المنصوب ف الميادين اللي بارجّع منه واعوفو
الكر/الفر  ..     كوابيس العالم..
والنكته البايخه فى اختيارات االمُستفتى المُطّر

طوابير الخيبه
ف مشهد ههزلّى .. عبسى .. عبثى  
بريحة الخوف وبطعم الغل

ناس بتموت على اغنية " تسلم "
وناس بتموت عل اغنية " تتشل"
شهداء بنشيع جنازاتهم على نغم التكتك
وزعيق الحزب الحاكم ونعيق الحزب المنحل

هل ؟
مصا رينكم  طلعت
كلها القرش
ف بحر الثورات الهادر
ونصبتوا الشادر

هل ؟
عطرتوا السجاجيد بالبانجو وقرشتوا الأفيون قرش ..
ولا قريتو القرآن كله ..
ف سرداب سرى .. علشان الأمن ما يعرفش
ولا دماغكم ولعت هرش..

زى حالاتى
ولا النوم اتهد عليكم..

 بعد ماردم الفرش
وهل ؟
.. بلّ الموج الهايج فيكم نار الشوق وطش
قلبكو هش وبش ..
ولو.. لدقايق.
يا شقايق

يا حقيقة عمرى المش طايق
والمتضايق جدا جدا من عمايلكم

حاجه تفطّس
شعب غريب !!!!
حتى فى عز الازمه يهجس
لأ والأنقح .. ها ها ها

شيخ الجامع ..
" "..جزمة بتقلع قدم الشيخ

تملى عينين الشيخ التانى

 واخد بالك –-

علشان لو خالف سيدنا الشيخ

رأي الشيخ التاني .. يديه بالجزمه
شوفتوا الازمة .

حاجه تغطس راسك منها فى لوح التلج الناشف

مشهد كاشف للى بيحصل جوه نافوخى

 
مشهد فاضح .. اسخن من أفلام البورنو

 
ولا رغيف العيش الكاره فُرنو

اسخن من مواتير الفتنه الفايره

اسخن م البت البايره

 
أسخن من كل الاسئلة الحايره ف راسكم

ونفسها تهدا وترسي ..
وياخد من شاء الكرسي ..

نفسها تنزل مع شقشقة الفجر
وترجع بعد العصر
بعد ما تعصر قلبها عصر
مش راح أغنى عليكم - -
مش رح اقولك علشان مصر.

علشان بس تريح بالك
زى عيال الشارع
اللى هرونا من شقاوتهم طول اليوم الفارع

 
وانت تعيشلك ساعة ف طاعه
وساعه صياعه
من غير فيجا .. وتت وبت ولعب وسيجا

بس ازاى...؟ ,حاجه جميله ومبهجه جداً
جداً جداً
بس ازاى..؟ حد يقولى ؟؟
تعزل نفسك بره العيشه وتعمل عيشه
- مابلاش عيشه –

تعزل نفسك بره الدنيا وتعمل سونيا

ولا تعوم ع الموجه التانيه وتعلى وترمى دماغك

ولا تسيب اولادك تشحت
وانت معسكر برّه يا عم
لجل ما تشهد آخر موجه فى ثورة بكره

 الفكره /النكرّه /الذكرى الباقيه فوق اسفلت الدم

عفريت الهم الطالع فوق الخيمة

 الغيمه المانعه النور ينزل للشارع .
والشارع مر..

 
كله محبس جوه الفكره وعامل حر.

وزبالة شوارعنا كتيره مش محتاجه فتّيلة

يا خميرة عكننه يا قبيلة كره وغلّ
ياكاوتشات الرحله الوالعه فى ثورجى ثاير لسه ما ملّ

كفايه علينا ..العوز المتربط في إيدينا ..عنينا أكلّها الذل .
ومش بتفرق بين الناصر والمحتل

ومش بتفرق بين الناصر والمحتل
كفااااااااااااااااااااااااااااااااااايه

حرام الشعب إتسل ..
العقل اختل..
من غير
هل؟
وهل؟
وهل؟
هل من حل ؟
<!--

....................

 حمدى حسين