صوت الجماهير
*********************
يا شهرزاد الحلم ..الحمل زاد
والحلو اصبح مر ..والمر اصبح زاد
خمرة لياليكى الجميله اتبخرت
والملح رسب ع البلاد
كفايه بعاد
دانا ابنك ..وابويا النيل
وانا المكتوبلى اقول مواويل
انا اللى الشمس كوّيانى بالف دليل
انا بن السد والسخره
يا كسرانى وانا الصخره
وانا الإزميل
انتى فهمانى
ولاحتى سمعانى
ياغلب الغلب يا مهجه
من الاول نقول تانى بشكل جديد
ياللى عينيك مملكه ..وضحكتك اوطان
جوانا شمع الرضا خلص بقالو زمان
حمل القلوب اشتكى م الليل وتغريبو
والشعب يا مملكه ..حفيت قباقيبو
الجاوى والمستكه بهدّل جلاليبو
هى الممالك كده بتجربع الفرسان
ياللى عينيك مملكه ..وضحكتك اوطان
خلصنا من سحنّتك..وقعنا ف الإخوان
طوابير حطينا على الدنيا
لفظتنا الدنيا طوابير
دبابير بتزن ومين سامع صوتها؟!!
صوت الجماهير
ضحكوا علينا عمر بحالو
ضحكوا وقالوا الصبر جميل
واما لمحنا العمر بيجرى من حوالينا
العمر بيجرى من حوالينا
ضحكوا وقالوا العمر طوييييل
صبرنا كتير بلا معنى
سنين العمر ضيعنا
وهمنا فى بلاد الله
عشان نلقى اللى يسمعنا
رجعنا.......
والعسل راح فين ؟!!
رحعنا والايدين فاضيين
ولا معنا ..ولامعنى
ما لقينا غير حبر السكات
وعيون بتصرخ ف النايات
خلى البنات ف الخدر مرتاحه
يا سنين يا رماحه
خلينا ف الحرمان
خليكى طراحه
وامانه ياأحزان
ضمّينا بالراحه
ضمّينا بالراحه
شعر/ حمدى حسين
ساحة النقاش