منظر متعدد لخروج الروح

قصايد بطول العمر

شعر

حمدي محمد حسين





بدل الإهداء

إفترض لو فساد الكون يزول بالاعتراض
إعترض لو فساد الكون يزول بالافتراض
إفترض لو فساد الكون يزول بالاعتراض
إعترض لو فساد الكون يزول بالافتراض
إفترض لو فساد الكون يزول بالاعتراض
إعترض لو فساد الكون يزول بالافتراض
إفترض .......................................
إعترض ......................................
إفترض .......................................
إعترض ......................................












مفتتح


كداب كلام كل الاغاني
والشعر و الشعرا
لا البقرة طلعت يوم على الشجرة
ولا يوم نزلي وش البت م القمرة
كداب كلام كل الاغاني
والشعر و الشعرا









مقدمة كل القصايد
ياصوت ادان الفجر
ادخلني قوي
امسكني من يدي اليمين
تبت قوي
خجلان انا
مكسوف قوي
والفجوه زادت بالقوي
انا نفسي والله العظيم
نفسي قوي
اسبق ادانك للصلا
و ابكي قوي
و ابكي قوي
و ابكي قوي





سؤال

لا تسألوني عن أمل ؟
لا تسألوني عن صلاح ؟
لا تسألوني عن فؤاد ؟
لا تسألوني عن بديع ؟
مات الربيع
علي كف مريم
مات الرضيع
والربيع
نازل مشوه
زى أحلام الجميع










المسألة أتحلت يا برمه ؟

كل اللي عارفه
أن الحياة بقي طعمها كوكا
بقي طعمها بيبسي
والمعطيات الكتيرة بتسبت
اني عرباوي
اخماسة تاهت جوة اسداسة
والمارلوبورو بيقطع باقي انفاسة
عرباوي لكن مأمرك
مداسة باسة عشان يفهم ويتعلم
فشم الديكسي فوق خده
فار الدم في عروقه
نزل تلطيش علي خده
وبعد اما اقام حده .. فرد يده
وعبا النيل علي كفه
شرب منه .. شنق تفه
علي خده
سقط ع اليد لحم الخد
وفضلت ريحة الورنيش
علي خده
وفضلت ماما أمريكا
( فتيه فرش )
بطعم
الشبسي
والكنتاكي
والكاتشب
















خلاص

مددين يا سيدنا الولي
مددين
الشمس تطلع فين ؟
يا رصاصه
فوق صدر القصيدة
متشوقين عصافير فؤادي
الطلقة جاية منين ؟
الطلقة جاية منين ؟
الطلقة جاية منين ؟














مافيش

الفجر ..
اتقطع في عيوني
خرابيش ع الكرسي
بتكشف ستر الكون
وتموت في السر
في عيون القاعدين ع البسطة
بيعدوا
فلنكات
الرحلة
↓ لنهاية الرحلة
...........
فوق
فوق
وانا باصص فوق








وجع

انا مت
يوم
م النيل حكي
وبكل احزانه بكي
علي قمحنا اللي كان في يوم
في مصرنا
له مملكه
وعلي الرغيف
خايف ليوم
تحصل عشانة معركة .










حالة

تصور …
دي رابع مرة بعد الالف
باتصور .. وانا ..
طافي
وانا
حافي
وانا
شايل علي كتافي
هموم الخلق .
حاولت كتير ..
الم لساني واتكور
حاولت كتير ..
اسك بيباني واتطور
حاولت كتير ..
انام صافي ، ومتعافي ، لكني فشلت .




غيبوبه

يا مثبت العقل
في الدماغ بالصبر
وممسمر الفكر
في الفؤاد بالدين
اية دخل الكوسة
يا خلق فـ البوسة
والخيار فـ التين ؟
هاوديني يا خايبه
مدام مفيش فايده
والشمعه مش قايده
علي صفحة الجرانين
وتعالي نتمشي .. بضميرنا نتعشا
انسي فؤاد وجاهين
وتعالي نتساهر
يا حروفي يا عواهر
مين في الحياة طاهر ؟

في صحتك يا نديم





خيبة الشاعر

بحبك آه
ودي أول مره
بقولها وبأفراد بوزي
ودي أول مره
الدنيا بتقلب
لونها فروزي .
وحياتك عندي
انتي الجايزة
وانتي الفايزة
وانتي اللي قدرتي تحوزي
علي قلبي البوزي
وتهدي المعبد .








توهه

عداش عليكم من هنا
وشي البرئ
دورت في كل الوشوش
ونحرت حس المكرفون
ما لقيت لا شمس ولا قمر
ما لقيتشي غير
ضلي مسابقني
وخطوتين
ما بيرجعوش .
يا هل تري ؟
ليه السواد
مالي المرايه ؟
وعيوني ليه خلف الستار
سهرت بتستني النهايه ……… ؟؟
ايه الحكايه يا بلد ؟
…………. متعرفوش ؟





مواسم

اوراق علي شجر الخريف
كانت بتبكي
وترتعش
وقليبي يرجف تحتها
المس خدودها
تنتعش
وايديا تحبل حلمها
افرك عينيا
تنكمش
والفرع يسحب ضلها
حسيت ساعتها
بالخريف
اللي بيعصر قلبها
حسيت ساعتها
بالربيع






سماح

سامحيني يا امه ..
اذا قطعت الف كتاب
اذا كسرت مية لعبه
لان المسألة صعبة
لان الرب
يا واحده
بلا تاني
في ارض الخوف
زرع أرباب
علي كتافها نجوم الضهر
وشارع كحل
ونسر عجوز
ومتكتف علي كتافها
بتنهش نظرته فينا
ورامي جناحة .. ع الأسياد







صرخه

برئ ..
يا صرخه في المرىء
يا حشرجه في الحلق
والخلق ملهاشي رجا
واللي نجا منا
قصدي اقول منهم
بمركبه العرجي
استكفي بالفرجه
علي منظر الجنوب
وفضل الهروب













امومه

نايم علي
صدرها
نايم ولا هامك
ما انت اللي ساكن قلبها
وصدرها همك
دلوقتي
فينك يا شقي
علي صدر تاني اترميت
ونسيت قوام امك













حرية

من زمااان
وانا غاوي رسم ونمنمه
اللون في قلبي الكون نما
وفي يوم باشخبط ع الورق
طلعت فراشه
لونتها .. ورسمتني .. لونتني .
واختها تحت الشجر .. نلعب سوا
نجري ونتكعبل سوا
سهتني طارت في الهوا .. ملت جمودي
واما غلبت اندهلها .. يا فراشة عودي
فكرت ارسم ع الورق جنة ورودي
بس الفراشة بحسنها
شدت ورودي لخدها
وفاتتني وحدي
ع الورق .. باقلع حدودي







لعب العيال

شجرة مخيط
في صحن بيتنا
بتتسند علي ظرب حيط
ضليله للكرسي الجالوس
كرسي الخبيز
ده لما كانت فرننا
حبله في رغيف قبل الغلا
شجرة مخيط
وقت الشتا ترشح دفا
يتفتح الزهر اللي مـ الصيف استوي
كحلة عيون
اخبارها تسرح فـ البلد
يا ولاد حصل
تاجي العيال بالخطافات
يصطادوا ياكلوا يتفتفوا بزر النوي
يلزق هوا في الجلابيه والنافوخ
والضحك يبقي للركب.
يا هل تري ؟
مين راح يكون ملك الحارات
في الطيارات ماركت مخيط
مين راح يمد اطولها خيط
عند السما يبوس القمر
مين راح يفوز في المؤتمر
لعب العيال ولا مخاط طعم المخيط .. هذا اللزج
اللي العيال بتفه لما تنضغوا زي الدوا
يلزق هوا بين العراميس الشقوق
والحيطان النص متر
والبيوت اللي بتضرب ساكنيها بالنوى .

*المخيط : نبات يشبه العنب
الجالوس : الطين العفن






افتح قوس

أمانينا
مافيش قدامنا
غير نسهر
نغنيها
والصبح
فوق قشر الشجر
نفحت
قبور ليها
ونقفل قوس .














السلم

الاغنيات
بتتكسر علي السلم
الامنيات
بتتكسر علي السلم
والكبيات
بتتكسر علي السلم
وياما ناس
في غمضة عين
نطة السلم
وانا لسه واقف في صحن الحوش
لا طايل ارض ولا سلم
تطبلي .. تسقفلي .. تهيصلي
عشان ارقص علي السلم
ما فيش سلم
مع اني طالع نازل طول اليوم
بالون حيط صحاب البيت علي السلم .





كاتبه بأطلالها البيوت

كانت بتغسل شعرها السيسبان
علي شط ترعتنا
حودت يمتها والشمس بتغازل جريد النخل
سط الدماغ سحر الهوا .. قيلت نمت
فردت سلاسل شعرها .. ولقيتني في العالي
همستلي واحنا في السما عالارض طل
كاتبة باطلالها البيوت
جمله عريضه نصها .. امجاد يا عرب امجاد
فرقعت انا طربوش عرابي
ونفخت قبه نص كم
خافت .. خفت
ونزلت الملم شعرها
واغني عـ الزماره .. وادق فوق الطار
احنا عرب احرار ..احنا عرب احرار
عرب ؟ احرار ؟ احا ؟ ¡¡¡¡¡







كل الكتايب بلادي

كل الكتايب بلادي
وفؤادي سلك الورود
ولا حاجة تقطع في قلبي
غير دمعه تبري الخدود
كل الكتايب بلادي .
الفرق بيني وبين عساكر الجيش هدف
وانا من زمان نفسي اتعدل .. التزم
انزل طابور النمل ادور
علي ارض بور .. حتى اخور أنهزم
والبس ساعتها خوزة القائد
ادي الاوامر بتصريح الخروج
اطلب من الشمس الحماية
ومن عدوي اللدود
قطرة الدم النهاية
وساعتها اصبح هدف
زي الرجال ع الحدود



عصفور سجين البدن

عصفوري فات السما
وحط علي كفي
يلم دود الوطن ويلقط الحواديت
فات البراح والوسع
وصبح سجين البدن
اسير صوابعي الحديد
..............................
عصفورنا طار للسما
وفاتنا بنطاطي
خدود بترقص غضب علي رتم ظباطي
شعوب بتخدم خدم

وخدم تدوس بالجزم علي شعبها الواطي .

ابكى عليك يا بلد

ولا ابكى على ناسك
ولا ابكى ع اللى اتولد
فى حجر نخاسك
ابكى عليك يا بلد
ولا اكتم انفاسك






عروبه

يا ورد باكي
بالندي
علي قبري فوق
صورة جمال
ضربت عيني
في المدي
ملقيتش غير
خيمه وجمال














 3عصافير

عصفورة سكنت حيينا
واحنا اللي يااااااااه
كتمنا صوتها في حلقنا
ما قالتشي لااااا
من يومها خرست زيينا
مش لاقيه آآآآه
عصفوره تاني للاسف
من غير جناح
حرقنا ريشها بكرهنا
بلبلنا ناح
يأست وعاشت وسطنا
وسط الجراح
والتالتة آمنت عشها
كام قشة ناموا في عشها
هبت رياح الخوف وقشت
ريشها وبيتها وفرخها





مرتين

بعت نفسك
مرتين
مرة لما
نزلت ليها من العلالي
ومرة لما
طلعت
امحي
اللي
انكتب














دروشه

علي طيف الــــــهوي نامت
ليالي شمسك الخضرة
وقامــــــت دولــة العــــاشق
تصلي في السما عدرة
علي حــــالي علي حـــــالك
بصوت خالي من النبرة
بكي المنديل في عين حلوان
وتــاه الـــدمع في شبرا
صـحي امـــــة الاحــــلام
وارمي الهلب في الحضرة













المولد

المولد عندي
لعب .. تسالي
مجرد هيصة ولعب وهلس
لقلبي الخالي
فول علي حمص علي خروب
ولب تسالي
وحصان وعروسة وجامع
عنتر زيد إهلالي
طراطير طرابيش زمامير
وسهر وليالي
وفرجة سرك وسحرا ورقص
حلالي بلالي
ونشان محظوظ ورمي المدفع
ضيع مالي
مجرد هيصة ولعب وهلس
لقلبي الخالي





تخاريف

أنا والأولاد
حابكين الدنيا بشلة خيط
وبنلعب كورة
لكن خايفين
زي خوف البندقية
لما تلبد في القصب
تحت كوبري الانتظار
بين أيدين
ملهاش صوابع
نفسها تطخ المواجع
100 عيار











ذكريات

أنا مش راح انسي
مر حلقي
وارتعاشي
وانكماشي
والشواشي الصفرا
لما طقطقت
من حر جوفي في الخلا
وسابتني ماشي
ماشي
ماشي
وحدي ماشي
دون ما امسك أي خيط
تقلعني من خشم التلاشي







صورة غلاف خلفي

100 الف جرنان
بينشروا خبري القديم
وبيعلنوا موتك
شطبوا حروفك
قطفوا الصورة
لكنهم نسيوا
بين السطور اسمك
وعقد حزون
رابط حروف القول
بخيط جني
واكمني حافض كلامك
مش مهم اقرا
بس الاهم
قراية الفاتحة علي روحك
ونعي بصورتي
في الجرنان






علي الأمير

كان أمير
قلبه بيساع الصغير والكبير
قبل ما الضيف كان بيدخل
كان بينده ع الوزير
كان بيدي ، وكان بيدي ، ولو بيدي
هامسح السطر الأخير
وادخل البيت المنور
بالقمر وشه المدور
ماسك الأهرام بيقرا
صفحة الأحوال
ويضرب كفتينة
الزمان الحلو فينه
نظرة شاردة وبينه بينه
مد أيده علامة استفهام كبيرة
وانسحب من بين عنينا
وإحنا لم حسينا بيه




زهرة القيامة

يا عم مهران
يا قلب سهران يعافر
يحفر في السنين بايده
يحلم لكل الانام
ما ينام الا اما نور الصبح
تطرح عناقيده
افتكرتك..
يا عم مهران
افتكرتك ..
وانت بتولع قمرتك
واحنا .. بنشيع جنازة ناس كتير
افتكرتك...
وانت راكب فوق عصايتك
هويتك تقطع المشاوير
لسة سامعك
من سكات
بتوشوش الصبار وتسأل
هو نور السقا .. مات؟
قمت أنا رويت بدمعك
زهرة الصبار
واتعوزت واتبسملت
وكتبت ع الرخامة
اسمك الثلاثي
لون عيونك
ووصية الناس اليتامه














تفاريح

تصدقوا .. ما تصدقوش
طعم الفرح ما عرفتهوش
غير لما كنت جنبكم
وفارقتكم ما فارقتهوش
قلبي اللي طابع بالملامح منكم
صورة علي كل الوشوش
بصوا فـ عينيا ما تكدبوش
صافية العيون تحت الرموش .
بصوا بقي .. من غير رتوش
ولا فيه غيامه ولا ملامه
قلبي اليتيم شط السلامة .. ما تنسهوش
باحلف لكم ومتحلفوش
وحياة غلاوة حبكم .. أنا صرت عاشق حييكم
رغم المسافة الضيقة .. بين الفراق بين اللقا
بصوا بقي .. انتوا في سمايا الزقزقه
وان غبتوا عني مرة يوم .. اليوم في عمري ما احسبوش




ترويح

خرافة .. خرافة يابسمة حبيبي
يا ريحة الجوافة في عين الصحاب

يا نظرة خدتني بصنعة لطافة
الف الكنافة في كف المسافة
في رجل الدولاب
غرامك فتني وخلاني اغني
بدون اكتئاب
وانسي عزابي وعلقم شبابي
وريحة الشراب
واتوه في الشوارع واهوي المطالع
ونبح الكلاب
خرافة .. خرافة يابسمة حبيبي
يا ريحة الجوافة في عين الصحاب








نجوم الليل

فوق غصوني
دبلت الكلمة اللموني
شكيت الحظ لاموني
نجوم الليل
قالولي استني فاستنيت
كمان اتمني فاتمنيت
نقشت الحلم فـ عيوني
واتاري الحلم نار بتجن
وصوتة رعد لمايئن
وحتى لما قلبة يحن
تكون ايامي نسيوني
صرخت يا حلم طال صبرك
امانه يا حلم هات صدرك
وانا ابكي الحلم بعيوني
سمعني النجم في العالي
همسلي فـ ودني قالهالي
واتاري حاله من حالي
امرني استني فاستنيت
كمان اتمني فاتمنيت
فرشت الصبر واتغطيت
ونام الرمل في عيوني
شكيت الرمل لاموني
نجوم الليل


















غنيوه لولادي

صغيرين .. صغيرين
بالفرحة والسعادة .. بنضحك ع السنين
نكبر وكل مادا .. نرجع صغيرين
الكف نونو .. والقلب نونو
إنما ساكن عيونو .. عشق للوطن الكبير
نحلف نصونو.. نزرع زتونو
وان نما الشوك في غصونو
نحضنه يطرح ضمير
يا كبار يا مخدوعين
خدوا م الأطفال براءة
خدوا م الأطفال جراءة
هاتعيشوا مرتاحين
في عيوننا النونو كونو
نونو نونو صغننين








تنهيده

أمه يامه يامايا .. يا حلمي الهارب جوايا
مظروفي لم لاقي حروفي .. وحكايتي في البعد حكاية
لا أنا قادر أصرخ أناديكي .. ألاقيكي ضله وسهرايا
ولا قادر أمسح بايديكي .. الخوف المتخبي ورايا
لفيت الدنيا دي ما لاقي .. غير حبك في القلب سواقي
والرايح من عمري يا أمي .. يحبك طول عمره الباقي
واللي ضناني كتير وحزني .. إني ما قادر يامه أهني
واللا في عيدك أجي أغني .. في جنينتك أزرع وردايه
لملمت جروحي يامايه .. وخنقت الأهه بضحكايه
ودعيتلك والقلب باعتلك .. تنهيده مش عايزة نهاية












من غناوي السهرانين

نظرة عنيها وري البيشة
كما الولعة علي الشيشة
وانا الميت من الدخان
وانا السهران
وانا السكران
وانا العطشان
ومية شوقي بترجرج
في بحر قزاز
سرير هزاز يا بصتها
وبصتها .. بتحرق قلبي
وانا قلبي حديد وفولاز
يكون قصد الحليوة جواز ؟.
ما يتعزش .. خد النظرة .. خد البسمة
خدي كل الحاجات الحلوة لميها .. ولايميها
وخليكي مع الساكنين في قلبي
عزاز





الفارس

أنا فارس
شديد الكر
ودمي حر
لا انصاع لسجاني
أنا حارس جبال النور
أنا فارس بنات الحور
وحبي ليكي خلاني
افك قيود
والغي حدود
واشد السرج من تاني
لكن جيتك .. ما لاقيتك
يا وحشاني
رجعت اندم .. واتندم
وتاني عدت من تاني
أنا فارس
بلاد فارس




الآهات

يا لاضمه العقد في رقبتك
وشانقاني
اهين يا ني
يا دقت كعبك العالي
علي اسفلت ايامي
يا فايتاني لحرماني وانا المصباح
اذا فجر الحقيقة لاح
وعمري في يوم
ما كنت في ضهرك الخنجر
ابوس الارض تتفجر..بلون اخضر .. بشاير خير
لا انا باطلق عليكي الخيل
ولا بازرع نهارك ليل
ولا باروي العطاشا غير
كاسات الشهد اسقيني
يا ناسياني .. وذلاني
وانا عنتر





وبالعربي

لا تمد العين طرفا
وارتجف إن رمت خوفا
العمائم
ما ارتدت
إلا الرؤس
والحدائق
انضجت
ايدي اللصوص
لا تمد العين طرفا
( قول لقلبك فضها )
لا تمد العين طرفا












فتافيت الرمل

يا خطوط مرسومة علي الكفين
بالطول والعرض
مليت طواحين الهوا والبرد
كل الحواديت الملتوتة
وامير احلام الحدوتة
في الغربة سنين طفح الكوتة
وبني الاحلام
وفضل يحلم
والحلم امتد
وما بين الجزر وبين المد
قصر الاشواق والحارة السد
وفي عز سواد العين
وليالي الخوف ع الارض
بنوتة بتبعت رسايلها
وتستني الرد
قلبين اترسموا علي الرملة
في الشوك والورد
وفي غمضة عين
نفدوا السهمين
كسروا الشباك اللي في قلبي
والباب الترد
ولا عاد الورد
ولاالعنتين
ولا غمازتين
نايمين
ع الخد













العولمة

انا مؤمن بالله وبديني
ويقيني بالله يقيني
فيه كلمة في جوفي بتتوجع
بعد أما في قلبي بتغميني
وانأ باسأل لو ممكن يعني
اذا كان فيه حد هيسمعني
واذا كان فيه حد هيمنعني
اتنيل واتلهي علي عيني
العولمة ...
دي يعني لازم ليها جيبة واسترتش
والحلاقة تكون كابوريا
والقميص H F B
يعني لازم ولا ايه ؟
العولمة ..
الكلمة دي معناها اية ؟
إعلامنا ماسك وسطها وبيهز ليه ؟
الكلمة دي ايه سرها ؟
وشبابنا ليه بيحبها ؟
ليه كل حاجة في عمرنا صبحت لها ؟
وبفضلها
الجدة كرهت حكيها
وإلام باعت بنتها
والبنت ضاعت بعدها
والابن برشم وانتهي
والاب فض المحفضة
وجابلوا دش
حتى اللي قاعد في الدره
وعمال ينش
علي حس حس العولمة
صبحت حياته معدمه
والمعلمة
مين اللي يقدر فـ الزمن ده يربي كرش
مين اللي يقدر فـ الزمن ده يربي قرش
عل حس حس العولمة
سمك يأكل في القروش
وقروش بتاكل في السمك
علي حس حس العولمة
كبارية بيفتح كل يوم
لكلاب بتنهش لحمنا
عل حس حس العولمة
افلام كتير ومسلسلات
وفلل في غاية الأبه
واحنا اللي ابونا السقا مات
يا قلل بتكره طميها
ملعونة كل الاعلانات
ع العولمة
علي امها .






من الأخر

اقلع عينيك القدام
وارميها في المخزن
ومن فيفي إلي روبي
يا قلبي لا تحزن
اقلع عينيك القدام
والبس الغربال
كل العيون بتوصلك للبت
نعجنها ليه ونلت ؟
لحم البنات في عضمنا بيفت
هو الجسد
لغة اللغات
بلا اغنيات بلا ست
اقلع يا شيخ العرب
ولا زمان الطرب
هلت ليالي النت






حلاوة روح

ملعونة قساوة الأتل
الحرف المفتول فتل
علي كلمة بتقتل قتل
يا صاحبي الكلمة بتقتل قتل
ملعون البوح
اذا كان هيطلع نوح
ملعونة السكاكين التالمة
لو سابت عقد النفس
وقطعت عقد الروح
ملعونة قساوة الجبس
علي القلب المكسور
الغيرة جبيرة القلب يا صاحبي
ليه بتطفي الشعر وليه بتقصب عصفور
محشوره في حلق الزور
الكلمة يا صاحبي اطلقها
فوران بركان الجوف مصباح
والصبر والنفس الطويل
مرماح
بالنوم علي وتر الخليل
ترتاح
اصبر تطول النجم
الكلمة ما هيش بالحجم
يا صاحبي
الكلمة حلاوة روح .















وفي الأخر

قول يا شاعر
طول مـ الشادوف بيئز
والألم بيحز
في ايدينا المفيش
قول يا شاعر
افضح
عري
استفز
رجرج وهز
الحزن فينا
وموت يا شاعر
مشمئز
موت يا شاعر
من امتي كان الفرح بيولد مشاعر
موت يا شاعر .









.........................................

كلمة ورد غطاها
كلمة بنتمناها
دابت فينا
ودبنا
ما تبنا
لما عشقنا
غناها
العدل






خطوط

مكتوب على كف الغبي مجهول
برديه من عهد الملك بهلول
بتقول : خط النار وخط النور وخط العمر
3 اخوات ما تقدرشي تقول البكري مين فيهم
3 عتبات تعتبهم ما تقدرشي تخطيهم
3 ألوان بألونهم بلون الدم والعتمة -
بيض القمري لون القطن – تلج البرد –
ملح الصبر – توب القبر – قلب الطفل
والرابع عمود مكسور
ومتعلق عليه الحلم
3 ألوان
هذار تجريح – تراب وعفار – عواصف ريح
تعدي عليه - تبل عينيه دموع الغيم
وأهل النظره يعميهم.. ما اتهزش وتر فيهم
سنين بتمر.. وتوبه الحر
مهما داب أواتشرطن
زي الورد ريحته فيه
طابور المدرسة والجيش
وقف تحتيه
وطلع من حشاه صرخه
بتنزف خوف ومن خوفها
بترفع راسها وتحييه
شفيف الحلم ورهيف ودمه خفيف
لكنه مخيف
وحاسس بيه قلبي اللي اتخنق زييه
بحبل الحب
لاهو قادر يضم الغلة يعجنها يسد الشق
ولاقادر يصادر نظره الناطق بكلمة حق







"حسن" الختام

متمدده بعمرالزمن ع الأرض ياعمه
منحوته من كتلة سواد بتشع في الأوضة
آخر روايح الحبايب
الليل معادك معايا
وكل ليلة تزعلي مني
لما تقيدي النور في آخرالليل
قبل الفجر بشويه ..وأنا من شويه طافيه
بعدين معاكي ..
- أنا عاوزه أصلي الفجر ياولدي
- وأشربلي قطرة ميه قبل المنع
وأنا عاوز أنام ياعمتي
قبل الصبح قبل الغلب قبل المنع
أنا عاوز أناااام
.......................................
...................................................
ياقريبه ..
باقعد كتير أتأملك .. حتى في صلاتك طيبة
ياعايشة للصوم والصلا
كيف انتي عايشه فطرتك متحملة
سبعين سنة رابطة الصله
ازاي بتصحي كل ليلة ف موعدك
أنا باندهش من قدرتك .. من فطرتك
وباندهش أكتر .. لما في ليلة بيغلبك نوم العيا
تصعب علي رقدتك .. بشويش أصحيكي
ياعمه قومي .. الفجر حان
تغمضي وتمتمي ( صليته ياغفلان )
أبص في الساعة .. أفتح الراديو .. أطلع الشارع
عشان أسمع القرآن
أنام وأنا مندهش .