حكاوي المسحراتي الحلقة السادسة
*******
هل الطوفان 
على حلمنا
رسم التاريخ 
صورة شبح
مسك القلم
فوق شملنا
مارد جمح
و حصانه
فوق الكون سرح
و تململت تغاريد طيور
ترفع في توب المئذنه
و تغطي تكبيرة فرح
و الضوء على
خد الأصيل
عناقيد سبح
قاعد أمام المندرة
سهم القضاء
يحمي البشر 
فوق الصيام
هل القمر
و لا عادشي حد
بيسمعه و لا يلمحه
ما الشمس
تاهت في الضلام
و الكون زحام 
يضرب 
على جبين الجدع 
كف الودع
بتقول سلام
المجد فوق
للي خضع
و اللي بلسان 
الخوف بلع
يقطف 
عناقيد الكلام 
يااااه ع الزحام
لما الأماني تتخطف
و تصير حطام
يمد أيده
و يعترف 
كان وهم تاه 
وسط الحصار
و الرمل مرشوش 
على البحور
شط النجاة
في الكون دا
ليك حق الحياة
تقف انتباه
تعظيم سلام
و أرفع علم
و احني الرؤوس
للي ظلم
تعظيم سلام
يحيا العلم
و اخفض لصوتك
بالحقوق
و علّي 
صوتك للعلم
ما الكون علم
و الزيف علم
و الكيف بحور
ماركة علم
و أزاي تقول
من غير ما عقلك
يضطرب
لأجل الوطن
لأجل الوثن
لأجل الكبير
يعلى لفوق
إياك تفووووق
خليك كدا عبد العلم .
منذ أربعين عاما و في صعيد مصر كانت هناك قرية غارقة في الظلام لا كهرباء و لا مياه و حين تدق الثانية صباحا يخرج المسحرتي يحمل مصباحه و طبلته و كنا ننتظره لنتجول معه في ربوع القرية و حين يصل صوت المسحراتي تجد البيوت قد أضيئت و منهم من ينتظرنا بأطباق التمر و الحلوى و طبعا كان المسحراتي ينعم علينا ببعض منه لكي نصحبه يوميا فنوفر له الأنس و الحماية من الكلاب التى تهاب الجمع فتولي هاربة و يحتفظ بالباقي ما أجملها من أيام في المحبة و التآلف بين الناس .
يقول فؤاد حداد
يا حضرة الباشا فاكر
ياما سَحّرتك
و دمعى تحت القمر
بالليل مَسح حارتك
و قلتلك خلّى
قطفه لك و قطفه لى
و ربنا يخلّى
اطفالك و اطفالى
و لا كنت بتصّلى
يا باشا و لا بتصوم
غير كل حبه
على السبحه تقول مخصوم
و كنت يا باشا
ما بتسمعش بالعربي
حضروا اطبا يردوا
السمع و الطاعه
حضروا اطبا
يداووا نفْس طماعه
افتح يا سمسم جماعه
حضروا بسماعه
تكشف قلب سحارتك