طريقة عمل الاكسسوارات خطوة خطوة
النهارده ان شاء الله هانتعلم نعمل حلق بسيط باستخدام المسمار والزرد
وده تقريبا نفس شكل الحلق اللي هانعمله النهارده 
ونشوف هانستعملها ازاي وكل حاجه هانستعملها في ايه بالظبط
هانعمل حلق يشبة الصورة ولكن ثلاث خرزات بس مش اربعه هانحتاج اربع خرزات ازرق واتنين لولي بني وشوية مسامير وشوية زرد واتنين عليقة الحلق ( بالنسبة لعليقة الحلق بتتباع جاهزة عند محلات الخردوات ودي سعرها الدستة بتلاته جنية وبرضو فيه منها الدهبي والفضي والاوكسيدية)
الخامات
ودي صوره الخامات اللي هانشتغل بيها 
الطريقة
أولا هانجيب الخرز الازرق واللولي وندخل فيهم المسمار بالشكل ده 
ثانية بالزرادية المدببه شوية دي هانتني المسمار بزاوية قايمة بالشكل ده 
وبعدين طبعا احنا المفروض بلف الجزء ده بحيث انه يعمل حلقة زي اللي موجوده اساسا في المسمار بس ده بيتوقف على شكل وحجم الخرزة اللي احنا حطينها ياعني هنا الباقي من المسمار ده طويل على انه يتلف ويتعمل حلقه فاحنا بنقوم بقص الزيادة بالقصافه بحيث اننا نسيب مسافه حوالي نص عقله الاصبع كده بالشكل ده 
بعدين بنلف الجزء الفاضل من المسمار بواسطه الزرادية ذات الرأس المدور بالشكل ده 
http://www.youtube.com/watch?v=R6Hvs39RpsY&NR=1">
وده هايبقى شكلها بعد ما لفينا الجزء التاني من المسمار 
وطبعا بنكرر نفس الطريقة مع باقي الخرز واللولي اللي عندنا بالشكل ده 
كده مش فاضل غير اننا نشبك الحاجات دي في بعضها بواسطة الزرد
اولا هانجيب زردة ونفتحها وهانستخدم الزرادية العاديه والتانية ذات الراس المدور واحده بنمسك بيها والتانية بنفتح بيها بالشكل ده بنمسك الزردة بالبنسة المدببة ونفتحها بالتانية العادية 
ودي بعد ما تتفتح هاتبقى بالشكل ده واحب اقول ملحوظة هنا اننا مش بنفتح الزردة بالعرض لاء بنفتحها لقدام ولورا ياعني مش بنشد واحنا ماسكين على اليمين والشمال لأ بنزقها رأسي مش افقي بالشكل ده بحيث ان شكل الزردة ميتغيرش ياعني نفتحها ونقفلها وتفضل على شكلها المتساوي والصورة هاتوضح النقطه دي ركزوا في شكل الزرده وهي مفتوحة هاتعرفوا انا قصدي ايه 
بعد كده بنجيب العليقة بتاعت الحلق وندخلها في الزردة بالشكل ده 
وبعدين نفتح الزردة تاني وندخل فيها خرزة زرقاء بالشكل ده 
وبنفس الطريقة ندخل زردة في الخرزة الزرقا وبعدها واحده لولي بني بالشكل ده
وكمان نكمل ونحط خرزة زرقا بعد اللولي البني بالشكل ده
وكده بنكون خلصنا الفردة الاولى من الحلق وبنفس الطريقة هانعمل الفردة التانية وحسب ذوقنا عايزين الحلق طويل قصير ممكن نعمله واحده لولي بس ممكن نعمله كله لولي كله خرز واللي في الصورة معمول اربعه مش تلاته طبعا الاذواق دي تبعكم بقى ابدعو فيها براحتكم وده الشكل النهائي اللي بيكون عليه الحلق
وبكده نكون عرفنا ازاي نستعمل المسامير والزرد وعرفنا ازاي نعمل حلق وبنفس الطريقة ممكن نعمل عقد بدل ما نركب عليقة الحلق نكمل تشبيك الخرز في بعضه بواسطة الزرد لحد الطول المناسب لينا ونعمل عقد بنفس الطريقة مفيهاش اي تغيير وممكن نعمله غويشة كمان ونكون عملنا طقم جميل بايدينا
========================================================
وبكده اكون انتهيت من الدرس الرابع وان شاء الله معادنا المرة الجاية مع اكسسوار اخرواتمنى ان يكون درس النهارده عجبكم ويكون سهل وبسيط ويارب الصور تكون واضحة برضه وفي الاخر هاسيبلكم مفاجأه صغيرة <!-- google_ad_section_end -->
ساحة النقاش