شركه جوجل

جوجل هي واحدة من أكبر الشركات في العالم, قيمتها تجاوزت الترليون دولار , واستحوذت على مئات الشركات حتى الان (حوالي 243 شركة)

طبعا كل الشركات دي مع امتلاك جوجل لأكبر محرك بحث في العالم

(بيتسحوذ على حوالي 92% من عمليات البحث) خليت جوجل شركة قوية جدا في تجميل وتحليل و استثمار البيانات, و بالتدريج بدأت تستفيد من نهر البيانات والمعلومات دي علشان تطلق مجموعة أدوات رائعة لأصحاب المواقع والمسوقين, تمكنهم من معرفة هما مين عملائهم وإيه سلوكياتهم وإزاي يستهدفوهم صح علشان يزودوا من المبيعات ومعدلات النمو ...تعالوا نبص على أهم 5 أدوات من وجهة نظري :

1- مقياس سرعة المواقع Google PageSpeed Insights

الأداة دي هدفها انها تقيس سرعة موقعك سواء على نسخة الموبايل أو الديسكتوب و تقولك إيه أسباب البطء وإزاي تعالجها, وطبعا موضوع سرعة الموقع ده حاجة مهمة جدا, كل لما موقعك يكون بطىء كل لما هتفقد عملاء محتملين أكتر وأكتر, حضرتك بتفقد حوالي 4,5% من العملاء خلال كل ثانية تأخير في تحميل الموقع, يعني لو الهوم بيدج بتاعتك بتحمل بعد 4 ثواني بينما عند المنافس بعد ثانتين, فكده نسبة الفقد في نسبة التحويل عندك بسبب سرعة التحميل هتكون ضعف اللي عند المنافس بتاعك, ودي خسارة مباشرة ليك, و 70% من العملاء بيقولوا ان سرعة الموقع بتأثر في رغبتهم في إتمام عملية الشراء من المتاجر الإلكترونية, أخيرا حابب أقولك : إن الوضع المثالي هو إن صفحة موقعك لا تستغرق في التحميل أكتر من ثانتين.

2- جوجل أناليتكس Google Analytics

دي أهم أداة من ادوات جوجل, الأداة دي وظيفتها توفرلك بيانات واضحة ومفصلة عن زوار موقعك وأعدادهم وأماكنهم وفترة بقائهم في موقعك وزاروا اي صفحات وكل صفحة قضوا عليها أد إيه وبيدخلوا من الموبايلات ولا الديسك توب و من خلال أي أنظمة تشغيل كمان.جوجل أناليتكس ظهر منه 4 إصدارات حتى الان, الإصدار الأخير هو الأقوى والأحدث طبعا وفيه مميزات كتير, وتقدر تربطه بإعلانات جوجل بحيث تعمل إعادة استهداف للعملاء من خلال بيانات جوجل أناليتكس وتقيس معدلات التحويل بشكل دقيق (هنتكلم في بوست منفصل عن النقطة دي إن شاء الله).

3- جوجل سيرش كونسول Google Search Console

الأداة دي هي أهم أداة في شغل تحسين نتائج محركات البحث SEO لموقعك, وبالتالي لازم تهتم بيها جدا لأن أكتر من نص زيارات المواقع بتيجي من خلال محرك البحث جوجل, وبالتالي لازم تهتم بجوجل سيرش كونسول اللي بيوضحلك أكتر الكلمات البحثية اللي المستخدمين بيوصلولك بيها وإيه الصفحات اللي بيجيلها أعلى زيارات وإيه الروابط المعطوبة اللي محتاج إصلاح وطبعا بيمكنك تضيف خريطة لموقعك بحيث عناكب البحث تفهم تقسيمة موقعك.

4- جوجل تاج مانجر Google Tag Manager

دي أداة مهمة جدا في إعادة الاستهداف , سابقا كان لازم تضيف كود برمجي لكل اداة انت بتستخدمها في إعادة الاستهداف زي فيس بوك بيكسل و تويتر بيسكل..إلخ, بالإضافة لأدوات متابعة الزيارات وتحليل سلوك الزوار زي هوت جار Hotjar, طبعا إضافة كل الاكواد دي بيتقل الصفحة وبالتالي ينعكس سلبيا على معدل الارتداد وتلاقي إن نسبة من العملاء غادروا الموقع لانه بطىء, جه بقى جوجل تاج مانجر حل المشكلة دي وقالك انت هتحط كود واحد بس وبعدها اي اكود تانية تضيفها من خلال جوجل تاج مانجر والاداة هتتعامل وتنسق بين شغل الادوات كلهم بحيث ما تسببش اي تقل للموقع.

5- جوجل أدس Google Ads

أداة إعلانات جوجل, اللي بتخليك تظهر إعلاناتك في محرك البحث وفي جوجل وفي المواقع المتعاونة, وده خط موازي للسوشيال ميديا كلها وميزته انك بتوصل للعميل اللي بيحبث عنك فقط مش مجرد ان الاستهداف يكون بالاهتمام العام وخلاص زي معظم مواقع السوشيال ميديا, وطبعا بداخل الاداه دي متوفر أداة فرعية مشهورة باسم google keyword planner ودي مهمة جدا لأي حد بيكتب 1محتوى ابداعي زي المقالات مثلا . أخيرا.....من الجدير بالذكر إن فيه أدوات تانية وإن كانت أقل شوية في الاهمية من وجهة نظري زي : جوجل تريند Google Trends وجوجل ألرت Google Alerts وجوجل ماي بيزنسGoogle My Business وغيرها من ادوات جوجل الرائعة...لكن نصيحتي ليك هي إنك ترتب أولوياتك: إتعلم الأهم ثم الأقل أهمية, ياريت تذاكر كويس جدا كل أداة من الأدوات الخمسة اللي فوق دول وهتحس فعلا بالفارق قبل وبعد ما تتعلمهم.---------------------------------------------.