((صرخه صوت))

متخافش من بكره
خاف بس من خوفك
خلى الزمن يكره
ف الظلم دا يشوفك

إصرخ وعلى الصوت
متنامش يوم مكبوت
ملعون ابوك يا سكوت
لو فينا تتحكم

زمن العجايب هل
شمس وبتزيح الضل
والحق لو بالذل
انا عمرى ما هاسلم
هانسى العتاب واللوم
وهانصف المظلوم
بالحق هاتكلم

دورت على روحى
لقيتها متهانه
ذودت ف جروحى
والجثه عيانه

صرخت يا ناس منى
قالتلى اه يانا
فتحت انا عنيا
مبقتش شايفانى
سألتها عنى
مكانتش عارفانى

سمعت انا صوتها
بيضوى ف ودانى
روحت اسأل الأيام
لقيتها ناسيانى

صرخت صرخة موت
وخطايا سابقانى
ف حضن ابويا اترميت
ولا حد واسانى

بقلم الشاعر
عبد المنعم خفاجه