جارى التحميل
استخدم زر ESC أو رجوع للعودة
اضحك يا واد مالك م الضحك مش هاتموت
ولا انت مستخسر انك تكون مبسوط
ليه مصاحب الدمعه ...... وان قدت يوم شامعه
تخاف واطفيها ..... لا الضى يأذى عنيك
نجوم سماك قافله .... متكتفه فيها
احلام كانت فى ايديك ... اصرخ بقا مره
كفايه خوف وسكوت
اضحك يا واد مالك م الضحك مش هاتموت
مسجومه ليه روح ... خايف تحررها
متغطى بجروحك .... ونايم على سريرها
انفض غبار المر ..... عمرك خلاص بيمر
عيش الى باقى حر ....وقيودك اكسرها
لملم خيوط نفسك ....وامسك فى قطر الحلم
اخلع قناع يأسك ..... وارمى عبايه الهم
تستحلى ليه اسرك .... وحنين قديم كاسرك
وحزن كان عاصرك ..... م العضم حتى الدم
ما تضحك يا واد مالك م الضحك مش هاتموت
ولا انت مستخسر انك تكون مبسوط
دى الدنيا دى فانيه واجمل ما فيها صوت
بيعلا ويزلزل رافض لاى سكوت
رافض لانه يكون عايش ومش مبسوط
اضحك يا واد مالك م الضحك مش هاتموت