| حجاب Spanish.. متحبيكيهاش بأه! | |
<!-- message -->
 الدنيا مقلوبة علي فاروق حسني وتصريحاته حول الحجاب وكلامه عن الورد ونغطيه ولا نكشفه.. في مجلس الشعب النواب عايزينه بأي شكل وشكله كده خلاص بيودع الكرسي الجميل بتاع الوزارة.. وحسين فهمي كان هيحصلوا لولا أنه لحق نفسه وطلق علي قناة فضائية وأعتذر وقال معلش.. ========== سيبك بأه من ده كله.. وتعالى كده بص علي موضوع الحجاب هتلاقيه بأه "سبوبة" كبيرة وبيجي من وراها فلوس حلوة.. هتلاقي بنات بتلبس حجاب اسمه "أي حاجة غير الحجاب".. تبص تلاقي بودي وجنيز ضيق.. وحجاب.. ========== زمان.. البنت وهي رايحة المدرسة أو الكلية بتظبط شعرها.. ولو كان شعرها مش ناعم قوي نظرا لأنها جنس قوقازي يعني شعر المصريين مش المفروض يكون سايح ونايح.. فبيبقى فيه زيارة أسبوعية للكوافير، مكواة لفرد الشعر وقص الشعر ومساواة الأطراف وحمامات كريم للشعر.. يعني كل أسبوع مش أقل من 20 جنيه بتدخل في جيب صاحب الكوافير.. وقبل الفرح مشوار الكوافير مشوار مقدس لدرجة أن العريس شخصيا بيروح يأخذها من هناك على الفرح علطول قبل ما أي شعره تفكر تتحرك من مكانها! ========== اللفات الفظيعة شوية بشوية الحجاب بدأ ينتشر.. بدأ شعر الستات يتغطى.. بدأت متحتاجش تروح للكوافير زي زمان إلا في المناسبات.. كل ده بنتكلم في النسبة ذوات الشعر اللى مش ناعم.. وبدا عداد الفلوس اللى في جيب صاحب الكوافير يقل! والكوافير نظرا لأنه تاجر بالدرجة الأولى من بيع مستحضرات الشعر للقص والتصفيف فلازم كان يبحث عن وسيلة تانية تدور عجلة الفلوس مرة تانية.. وهنا كانت البنت اللى ماشية مغطية شعرها بدأت بموضة جديدة –معرفش نزلت علينا من انهي داهية- لفة الايشارب السبانيش spanish. وبدأت الموضة الهباب تنتشر.. وأمينة شلباية تطلع تقولنا أزاي نلف اللفات الفظيعة اللى ع الموضة.. والبنات تتبارى في إن كل واحدة متعلمة لفة تعلمها لصاحبتها.. وهنا الكوافير بدأ يفكر بشكل جدي في الاحتراف!.. نفس البنت اللى كانت بتكوي شعرك هي نفسها اللي هتلفلك الإيشارب.. وافتح قسم خاص للمحجبات وخلي العجلة تدور! اللفة بعشرين جنيه لو رايحة عيد ميلاد واحدة صاحبتك وهيقدملك لفة لورا هتبان بس فيها رقبتك ولو مضايقاكي أوى ومحبكاها "ومتشددة كدة"، علي حد تعبيرهم، فيا ستي ابقي البسي "كارينا" برقبة أو أي تي شيرت أو بودي برقبة وخلاص.. متحبيكيهاش بقى امال! اللفة بخمسين جنيه لحد 300 جنيه لو رايحة فرح لطبقة متوسطة.. وهيقدملك اللفة الهندية اللي بيعمل شعرك فيها بالأساس شنواه عشان اللفة تبقى مرفوعة وتبقي زي الزرافة.. أو ممكن تاخدي اللفة، أو ممكن يعملك اللفة اللي تبقى زي الضفيرة على كتفك.. أو شوفي أي تسريحة بالشعر ممكن تكون أزاي أعملها لك بالايشارب! م الآخر. لفة المشاهير Jما لو كنتي رايحة فرح لطبقة مشاهير ونجوم المجتمع فلو محبكاها أوي ومصرة تلبسي حجاب من أصله فتقدري تروحي لأشهر كوافيرات البلد ومتقلقيش اللفة مش هتزيد عن 3000 جنية ولا هتقل عن 1000 جنيه.. مهي مش أي لفة، هو صباع محشي بنلفه ولا إيه!. أهم حاجة انك هتمشي هتلاقي كل الناس بتقولك شكلك فظيع النهاردة! ومتخافيش رغم ان فظيع بتحمل معنى وحش لدرجة القرف إلا أنهم أكيد أكيد هيبقوا قصدهم ساعتها أنك تجنني وتهوسي! ========== ما غاب عن أذهان هؤلاء أن كلمة حجاب أتت من الحجب والإخفاء ولا تعني إخفاء الشعر فقط بل حجب الفتن.. ولكن من الواضح إن مفهوم الفتن هو المُختَلف عليه! للأمانة مستبعدش الموضة القادمة تبقى بنات متحجبين ويقولولهم البسوا الباروكة بقى من فوق الإيشارب وأهو مش شعرك وأديكي محجبة.. وقلتلك 100 مرة متحبيكيهاش بقى! | |
Emi
نشرت فى 3 ديسمبر 2006
بواسطة emansamy
عدد زيارات الموقع
1,306,690
ساحة النقاش