ليه ساكته ؟؟؟؟
××××××××××××
بَحِبّك إنتِ ليه ساكته ؟
وشارده كتير ومتّخده ؟
أنا حبيت صفا عيونك
وكانت السما شاهده
ما نيش بحّار على مركب
وبقصد كل يوم مَرْسَى
أنا صادق ما نيش بكدب
ومادد للوصال إيدى
ما نيش بعتب
تعالى بعقل نحسبها
بلاش نهرب
أنا لو جَد بتْزوّق على حرفى
وأقول غنوة
وطاير كل يوم على غصن
مكنش الشوق هيحملنى
على بابك
أنادى القلب والنّنى
ولو أسهر على أعتابك
أنا من يومى متْلفّح 
بشوق خلاّنى كالعاشق
ولو عارفه قانون العشق
ما شكَيتِ يا عمرى
ده أنا بحسد نسيم الليل
لمّا يهز شبّاكك
واغْير من كل اللى سِمْعِك يوم
أو حظّه فى يوم شافك
أنا مولاتى ما بعرف
كلامى ليه تقيل عندك
أنا مخلص ما نيش خاين
وحلمى أشوف فى يوم سَعْدِك
ليه شايفانى زى الناس ؟
وأنا شايفك حجر من ماس ؟
ولكن جوّه منّه قلب
طريق العشق جوّاه صعب
بيعشق اللى عاش خاين
وحتى اللى ما لوش فى الحب
له عندك مكانه وجاه
وأنا العاشق بقولها آه
وحاطط كفنى على جسمى
وبشّاهد فى كل صلاه
وآهى عِيشه
ومسْتنّى
أشوفك يوم تبصّيلى
تشوفى الدمعه فى عيونى
تلمّى الباقى من دمّى
م أنا طول العمر نسيانى
وداسس فى الوريد همّى
وبرضو بحب أعتابك
وهفضل عمرى على بابك
مسيرك مرّه تتوضّح لك الصوره
وترمى مرايه مكسوره
ما يوم صدقت معاكِ فى يوم
وأنا ........
صبرى عليكِ يدوم ،،،،،،
بقلم / إبراهيم فهمى المحامى
22/10/2015