☆قهوه في حاره☆
قدام بيتنا فاتح قهوه
لاما كل ولاد الحاره
هوب فجأه .... حصلت كابسه
مسكت كام واحد بسجاره
قعدوا كل ولاد الحته
يحكوا فيها قصص بجداره
و أنا فاضل قاعد ع الدكه
أسمع من خالد و عماره
واحد قال أنا جاي بالحابكه
لقيت البوكس بيدي إشاره
قومت رجعت ف نص السكه
أصل ماكنش معايا بطاقه
و التاني ....أنا هنا من سته
كنت بخلص شغل محاره
شوفت شباب بيلفوا باكته
روحت أنا ماشي و قولت حقاره
رد الواد أحمد أبوسنه
قالي سمعتك قولت عباره
قولت هكلم عيل نونه
كان بيروح مع إبني حضانه
أما الثالث يبقى أبومنه
فاتح جنب القهوه عطاره
شاف الناس إتلمت فجاءه
و البوكس بيجري طياره
و أنا قاعد و الكل بقصه
و المطره بتنزل بغزاره
و اللي يقولي أنا كنت ف جمصه
و اللي يقول كان عندي زياره
فجأه لقيت بينادوا على جثه
قالوا محمد ألف خساره
خارجه بسرعه تصوت نسمه
و أم فاروق و عبير و سماره
و بدأت قصه غير القصه
و كله فاكرها تبقى شطاره
قولت أنا توبه أقعد ع القهوه
أو أسمع كلمه من جاره
أصل القهوه دي بقت شبهه
تسمع فيها كلام بقذاره
قولت أنا هبعد دول ناس فتنه
أنا أصلي شغال ف إداره
حد منهم يسمع كلمه
أو يسرق مني النظاره
بقلم
حسان غانم
