أنا الشعب

شعر/محمود العزب
8/1/2008

رِجل جُوَّه ورِجْل بَـرَّه
ونِفْسى ألْقَىَ نَفْسى مَرَّه
طير وطاير فوق سَمايا
وابْقَى عارِف فين هَوايا
والْقَىَ أرضى مُش مُضِرَّه
ورِجْل جُوَّه ورِجْل بَـرَّه
رِجْل جُوَّه ورِجْل بَرَّه
والحَلاوَه ف بُقِّى مُرَّه
ورغم إن الجوع قاتِلنى
بَسْ عامِل مُشْ هامِمْنى
وانِّى عايش عيشَهْ حُرَّه
ورِجْل جُوَّه ورِجْل بَرَّه
رِجْل جُوَّه ورِجْل بَرَّه
والحياه مُشْ مُسْتَقِرَّه
واللِّى واخِدْ حَقِّى مِنِّى
من وقاحْتُـه بيِّتَهِمْنى
لأ ومِنِّـى بيسْتَعَـرَّى
ورِجْل جُوَّه ورِجْل بَرَّه
رِجْل جُوَّه ورِجْل بَرَّه
واشْتَكيت لَك ألْف مِرَّه
واْنْتَ يعْنى مُشْ سامِعْنى
والاَّ خايف م اللِّى باعْنى
واللِّى عَشِّمْنى وخَدَعْنى
والاَّ ناوى تِهِجْ بَــرَّه
ورِجْل جُوَّه ورِجْل بَرَّه
رِجْل جُــوَّه ورِجْل بَــرَّه.