ولسّه ذهولى متربع
وبيقربع ف نن العين
وعكازك بيسألنى
عليها كنت باتوكأ
خدوها لفين ؟؟
ولسّه لسانى مش قادر
يقول عدّت
ولا للأخره رجليها الخطى مدّت
وسابت دمعتى والعه
وضحكه باشوفها واحايلها
عشان تطلع ماهيش طالعه
انا أمّى بدون أمّى
تعبنى الكسر فى الإعراب
وباستناها تشرح لى
لو انّى مّت قبليها
أكيد الموت كان اريح لى
لكين الدنيا دى أعمار
وعمر مقاسه فيها الشبر
وعمر مقاسه بالأمتار
وانا محتار
هديتى وقت عيد الأم
هاجيبها ازاى واخدهالها
وابوسها ازاى على الخدين
ولسّه ذهولى متربع
وبيقربع ف نن العين .
