عشقت الليل
*****************
عشقت الليل ..
جدايل شعر من شعرك تطير بيا
تعدينى
تودينى لأدان الفجر فى عنيكى
أصلى لأحلى أيامى
عشقت الليل
عشقته نايات بتتغنى
ايدين لبنات بتتحنى
وتستنى
قدوم الخيل
عشقت الليل اذا مايطول
بصوت أرغول
يقرّبنى من النبره
نجومه عشقتها بنظره
عشقت رموشه سيف مسلول
وشدّة حيل.
عشقت الليل
بلابل نايمه فوق سدر الهنا بتحلم
ولابتعلم
بعين صياد بترقبها
ومن أحلامها تشطبها
وتكتبها ف سجل الويل .
عشقت الليل وتر فتان
غناوى لفرح ولأحزان
تخلينى أصوغ طبعى
فى وقت ماعوز اكون ممنون
ووقت ماعوز اكون محزون
أخلّى الليل يصير ملعون
يشيلك من جدورك شيل
عشقت الليل ..
أقول لك ليه عشقت الليل
عشان أول ماحبيتك
ندهتينى ولبيتك
وكان معبدنا حضن الليل
ومن يومها
عشقت الليل .
********
شعر/على جامع
