متغيرتش
...........
جى تسألنى .. ماتغيرتش؟!
طيب قوللى ازاى أتغير..
ولا اقنعنى أتغير ليه ؟!
هو علشان اتعملت ثوره ..
تشقلب كل حياتى يابيهّ!!
أنا متعود
قبل مانور الفجر يشقشق
قبل العصافير ماتفوق وتزقزق
أحجزلى مكان فى طابور العيش
والوقت يعدى وانا بترجى
واناشد رجلى ماتخذلنيش
ويفوت ساعتين ، تمن رغيفين
تشوفنى ساعتها وانا من الفرحه
طاير طيران
كأنى دخلت فى سحب جوايز..
وطالع كسبان
بنطالى سليم ماهوش مشروط
هو بس قميصى يادوب عرقان
واجرى اتشعبط فى السرفيس
وحاسب ياسطى .. وطول ماشى
وانا أنفاسى يادوب طالعين
واسرح حبه ، وأزأز لبه
وتلمح عينى كده فى قميصى
طاير منه يادوب زرارين
جاى دلوقتى تقوللى اتغير
دانا ع الحال ده بقالى سنين
بجرجر روحى غصب عنى
ولا بتسألنى فى يوم على فين ؟!
اتعودت أطلع من شغل أروح التانى
لما حياتى بقت كرهانى
لما عيالى بقت كرهانى
أنده ل احمد على انه امجد
وانده رغده اللقيها أمانى
وانده مرتى ..
تعمل أيه ماهش سمعانى
وانده تانى .. وتانى وتانى
واسمع مرتى تتمتم ياااااااااه
لسه فاكرنى !!..
ولا ودانى .. هى اللّوجعانى
اسمع يانت ..
اسمعى يانتى .. ياحضرات
فجأه لقيتنى ..
بنك همه يورد الفلوسات
ولايسمعشى غير هات من ده
ومن ده وهات
لأ واللوقتى..
مطلوب منى أقف فى ميدان
واهتف بعلو صوتى الضايع ..
وانا التعبان
وانا الميت وعمال يجرى ..
كما الرهوان
واهتف يسقط حسنى مبارك
واهتف يسقط الأخوان
واهتف يسقط حكم العسكر
واهتف يسقط كل جبان
واهتف يسقط ، واهتف يسقط
واهتف واسقط وانا مش دريان
واهتف واسقط ..
وانا مش دريان
.................
عبدالحميد المرسى
