............... يادنيا .................... 
يادنيا كفايا لف ولعب بقا بينا 
دأحنا خلاص يادنيا منك أستوينا 
خدنا ايه منك ولا أيه حتدينا 
دأنتى غسيلك نشف لما غسلتينا 
وياريت رضيتى بكده لأ دأنتى عصرتينا 
وبعد العصر فردتى وكويتينا 
فى الرزق تعبانة ومبنقولش تعبتينا 
ذى ماتكونى مستخسرة رزقنا فينا 
دأحنا طول النهار واقفين برجلينا 
وعمرنا يادنيا مابصينا لنفسينا 
وحتى لو حصل مرة ولا مرة تهنينا 
مليانة كلك عيوب وتجيبى العيوب فينا 
تبقى انتى اللى غلطانة والغلط بترمينا 
دى الحلوة دى ميتك والمر تسقينا 
بنحاول نشوفلك دوا وانتى تسمينا 
ولو فى يوم فى أزمة تندهى علينا 
ساعتها بتبقى فكرانا وفاكرة أسامينا 
احنا اللى نحميكى مش أنتى اللى تحمينا 
نلبسك جلاليب وأنتى تعرينا 
جبنالك الحرية وأنتى حبستينا 
مليناكى بالحنية ومنها حرمتينا 
أنا كنت فاكر نفسى وردة فى جنينة 
لو يوم اعتبرتك مركب لازم تعدينا
أمال حنعمل ايه ماانتى حوجتينا 
خليتى ليه الخسيس يتحكم بقا فينا