( شقاوة ولد )
عندي ولد بسبعين ولد
في دوشته
ازعق واشد فى شعري منه
ولما يبكى تجرحني دمعته
أخده في حضني أطبطب عليه
ميرتحش قلبي غير لما أشوف ضحكته
تلت سنين بعقل تلاتين سنه
ولما يسأل سؤال ساعات
معرفش أرد عليه أنا
بداري وشى من تكرار السؤال
مفيش جواب
سؤال غريب هو فين ربنا
طب هو قريب مننا
ولا بعيد
بيبكى من عينه ولا سعيد
أخده في حضني واقله
جوه كل واحد فينا
ربنا اقرب من الدم لينا
معانا ديما فى الصلاة
وأفضل أقول بس مش عارف
إن كان فهمنى ولا مفهمنيش
وسكوته ده من باب التطنيش
بقلم/ الطيب عوض احمد
