<!--
<!--
قلت لنفسى خلاص هرتاح
بعد ماجانا حاكم ورئيس
ردت قالت اوع تصدق
بص شوف تويتر والفيس
صراعات دايره ورايس قاعد
على كرسى مليان دبابيس
والدبابيس كلها مدسوسه
ماده ايديها فى قلب الكيس
عماله تضغط عماله تنهش
عايزه الكرسى لو بالفيس
بكت كل أيام الثورة
جمعه وسبت لحد خميس
والملايين فوق أرض النيل
عماله تسأل فين رمسيس
فين سلطانه فين أعوانه
راح بميدانه بقى شيش بيش
قلت لنفسى أعمل ايه
بعد ما فتحوا علينا هويس
قالت اكتب ارسم اصرخ
خلى حروفك سلطه وجيش
اوع تخاف فرعون فى الدنيا
واوع يهمك بطش السيس
صوت الحق هيفضل صاحى
للتحرير من اى وريث
ينهش فينا ويبكينا
لما يخلى لحكمه وريث
لما يخلى الحزب بتاعه
ويا اتباعه يبقوا دراعه
يزرعوا فتنه وفرقه مابنا
بعد ماصرنا انيس وونيس
قلت لنفسى انا خايف اموت
لكن خوفى مش م الموت
خوفى الضلمه تعود من تانى
وارجع تانى بقلمى حبيس
بين جدرانى وحدى اهاتى
اصرخ اهتف فى الكواليس
يسقط يسقط كل نظام
بكى حروفى فوق الكراريس
خلى دموعى حروف مكتوبه
على جدران صفحات الفيس
وابدأ تانى ثورة جديده
صوت الحق ليها رئيس
وحدة شعب هلال وصليب
يحميها كل عساكر الجيش
ترفع راية الامة لفوق
تحمى ديارنا من الخفافيش
تحريرا فى 12/7/2012
ساحة النقاش