مواويل الثورة
للشاعر عبدالهادى الشعراوى
الهياتم – المحلة الكبرى – غربية ت ( 01275385363 )
ياعاشقين الأدب الشعـر له الـــــوان
فوق الورق كلمته موزونه بالأوزان
وعشان نشق جـدار الأمن والأحلام
لازم نعيش كلــــــنا نعلى فى البنيان

من صغـر سنى وأنا مهموم بموالى
أكتب وأرسم وألون كل إللى يجرالى
وبعـد تلاتين سنة فكـرت وبتدابيـــر
يرحل ظلام ينتهى وموالى يحلالى
***
الكلمة مدفــــــع بيدفــع والرك ع الرامى
وحروفى طلقات بارود وحد سيفى حامى
وطنى الكبير عزوتى وحب زرعه ضمير
لو يوم عــــداه العـــــدو أفـنيه بأقـلامى
***
ياحارسين الوطــــن إصحـــو للغـربان
خارج حدود الوطـــن وداخل الجــدران
دا حلمهم ننتهى ونعيش كما التصاوير
ياخـلق هو صحصحو الغرب دا طمعان
***
تلاتيـن سنة والهم حـــاضن مياه النيل
من إنسى باع البلد وعاش على التهليل
وحكومة ياما زورت ظلمت وياما كــتير
زرعت بإيدهـا العـفــن فى النهار والليل

الخطة كانت وراثة محبوكة م الشياطين
كانت كلاب الحراسة هى الحـما والعـين
النت كشف الحـكاية بدأنـــا فى التطهير
خــاف النظام الغــبى وشعللو الميادين
***
شبعت قـولة آه من سجنى جـوه البيت
وأمن دولـــــة ظـــلم كل حـيطان البيت
زرع فى قـلب الـولد والبنت هم كـــبير
علشان عيون مره عايزه وراثة البيت
لما مسكنى الألــــم وزادت الأوجــاع
نادانى سن القلم ورحمنى م الأوجاع
فضفض هتلقى الدوا فى كتابة التعبير
إهجى حكومة ألم جابت لنا الأوجاع
***
لحظة مازاد الوجع قلت كفايه سكات
على حكومة البدع ولجنة السياسات
زرعت فينا الوجع وسقـتنا بالتقطير
هرمنت آه الوجع زاد الوجع مسافات

الثـورة آهــــــى إبتدت وصرخة الميادين
صوت الرصاص حضن الشعب قال آمين
دم الشهــيد هتـــف إرحل ياأبو التزوير
سقطت حكومة الغبى كانت حياتنا طين
***
الكــرسى لما إنهزم إتشـــل م التفكير
خطـب خطاب بغـشم ماكنش له تأثير
سلم لحكم القدر صاح الوريث ياكبير
قاله كفايه إنكتم ياللى حفــرت البير

قالو جمعة رحيل أنا قلت مش معقول
حلمى بقى حقيقة وهغنى ع الأرغول
والفرح يرجـع لنا ويعود لنا التنوير
بعـد ماسال دمنا من جمال وخيول
***
سألت يومها الجــــمل ليه تعادى أحرار
ليه تبــكى الـــوطن وتدوس على ثوار
قاللى الفلول السبب واخدين إبنى أسير
عما أنتهى م العمل ويرجعــــــوه للدار

الثـورة كشفـــت كــتير عن فــترة زمنية
الشر فيها إتولد وإتجـــــبروا الحــــراميه
هدموا بيوت حملها يكسر فى ضهر بعـير
الإسم كان خصخصة دى سياسة يهودية
***
النيل سكـــت ع الغــنا وبكى مع الشطين
لحـظة ماشاف الضنا ملفوف بدم حزين
حلـــف مايعـلى بغــــــنا إلا بحكم بصير
وحكم القصاص ينجلى يزين الميادين

بقــول لكل القضاه العـدل شيىْ مطلوب
إوعـــو تخلو الضغوط تعكس المكتوب
معصوبة عين العدالة وإنتم التحـــرير
إنتم ياحصن الجميع غالب مع مغلوب
***
الخوف معشش فى قلبى ع الثورة يابهية
إعلام بيرقـص ورقصه على كل فضائية
الكلام لساسه هـشاشه طلعــوا بالتزوير
فاكرين ولاد البلد لقمــــة سهلة طـرية

تعبان ياخلق ياهــو م الفتنة والوسواس
وبلطجة وسيوف وبانجو جـــوه إكياس
وشباب حياته كيوف مشلــول التفكـــير
لاهمه أمن وطن ولا همه رعب الناس
***
الجرح مهما نزف هيجــــيله يوم ويطيب
والورد مهما دبل العــــطر فيه ما يغــيب
ومهما حــبسو الوطن بالفتنة والتعــسير
وطنى هيفضل عفى ولاعمره يوم هيشيب

قاوا جمعة غضب قلت الغصب مشروع
قالوا تحدى وصمود قلت ماهش ممنوع
وكل جمعـــــة كدا نخطها فى تكســـــير
قلت عايزنها تبقى بنى ونكمل المشروع
***
مشاكلنا جوه البلد محتاجه لعناية
محتاجه طب ودوا وادارة ودرايه
وحكومة تكون مننا همها التطوير
ترفع شأن البلد وتخليها حكاية

الله عليكى ياحلوه حره بعد سنين
قومى امسحى دمعتك وباركى للملاين
ورد جناينك ظهر وهل بالتباشير
مبروك عليكى يامصر شبابك الحلوين
***
أنا بإسم كل المحلة فى سته من إبريل
بأقدم أخلص تهانى بالحب والتبجيل
أصل الحكاية اننا زرعنا التنوير
حصد الجميع زرعنا ولاحد فينا بخيل

نفسى أشوف الوطن فى بياض الشال
من غير دموع أو ألم ولايحكموش دجال
وان دقت الساعة خطر عشقى هيبقى غزير
النفس والروح هدية وفقهم زاد المال
***
برغم ان البشر هما اللى شعلو النار
الثورة كانت قدر من راسم الاقدار
ويشهد مطر السما اللى ملى التحرير
وحضن أرض وبشر فى ساحة الثوار

ياعم لأجل النى بكفايه إئتلافات
عايزين نعود للعمل ونبعد الخلافات
بكفايه تلاتين سنة جف فيها الزير
والشعب ياما إتفرم يكفينا إنهزمات
***
سألونى يوم ليه حروف القلم باكيه
والكلمة فوق الورق رافعه الإيدين شاكيه
قلت البكا والألم دى ملامح التعبير
لما حكومة البلد تكون حكومة سكه

الطير عاشق السما لإنه فى حرية
نفسى أطير للسما وأعيش ليوم حرية
أحضن نجوم السما وأغنى للتطهير
لحظة ما مطر السما يغسل بلاويه
***
تحرير ياغنوة وطن تلاتين سنه مسموم
بإيدين أبلسة وطن كان همهم النوم
فوق كرسى شعب وشورى ماكنش له تأثير
حررت والله الوطن يارب لينا تدوم

قبل ثورة يوليو كان الحاكم واحد
ملك لكل اليلاد والكرسى كان واحد
بعد رحيله إبتدى يحكمنا ميت واحد
سرقوا كل الوطن وعصوا الواحد
***
أنا لما جيت م السفر وحضنت طمى النيل
شكرت رب البشر على عودتى للنيل
الضيء على ميته والنسمة جايه عبير
عرفت معنى القدر وعرفت هبة النيل

وطن بدون حراس هيجلب الطامعين
ديابه تنهش فيه من كل مله ودين
يعكروا فى النيل وأبو هولنا يبقى أسير
ياولاد بلدنا إرجعوا الفتنة م الشياطين
***
ياساده لو تعرفوا الكرسى له هيبه
لازم يكون دوار مايكنش تأبيده
أصل التنافس مقدرة وسكة للتغيير
ترفع راية الأمل وتخصخص الريبه

معجون فى قلب الأهات مشتلق للراحة
وبرغم حفظى الأيات وصلاتى فى الساحة
راضى بكل الأهات وحضنى ليها كبير
بشرط أشوف الوطن عيونه مرتاحة
***
ياللى هزمت الفساد هتفوز بأصوتنا
إوعى تدوس ع الزناد وتبكى فرحتنا
خلى هموم البلد زادك ومية زير
د مصر هى امنا وحضننا وبيتنا

ياعاشقين النبى قولوا معايا الله
دم الشهيد اتنزف بالدمعه ويا الأه
رسم خريطة وطن وعاد لنا التخضير
تعظيم سلام للبطل مع كل من يلقاه
***
أنا لما بكتب بقلمى وأرسم هموم الناس
بحس إنى محارب ضد اللى ظلم الناس
قلمى وورقى وحروفى سلاحى للتطهير
ساعادتى إنى اعيش حاضن هموم الناس

وزير أخد شنطته م لقاش فيها حاجه
رجع لمكتب نضيفه يطلب الحاجه
قاله عيب إختشى بكفياك تبذير
كله راح خصخصه وانباعت الحاجه
***
وزير دخل مكتبه عمله ميت حارس
مايدخلوش مكتبه إلا عليه حارس
أنا قلت ليه كدا فين بقى التغير
ردت عليه القيود وعصاية الحارس

م الثورة خرجت كتير روابط وائتلافات
د غير احزاب المعارضه وغير الجماعات
الكل عمال يغنى وعامله طوابير
والأغلبية الصامته ياعينى ما بتبات
***
وزارة إتشكلت من قلب الميدان
لبست توب اليطوله وحذرت فى بيان
بكت قلوب البشر من كتر التخدير
الشعب قام إنتفض وأعلن العصيان

أنا لما زارنى الهوى فى المضيفه الضلمة
فتحت عينى لقيت قنديل وله عمه
فارد شعاع الأمل على ثورة للتحرير
قلت دابشرة أمل واصبر على الغمه
***
لما بكيت القلم وكتبت رباعية
لقيت روح القلم جيانى ملاغية
ياصاحبى ليه البكا الدنيا هم كبير
الجنة فيها اللقا للشهدا دى هديه

الدمع سكن القلوب بعد ماشاف الجدار
صحى لهيب الألم ونادى ع الثوار
بكفايه تلاتين سنه تطبيع وصوتنا أسير
باعوا فينا واشتروا والسرقة بالمليار
***
قالوا تسعه أغسطس جمعة تحديد المصير
ياريت بقلمك تشارك وتغنى فى التحرير
دى مليونية مطالب هيكون لها تأثير
قلت ياخلق المصير مرهون بقوة كبير

لما الجدار اتهد قلت البشارة بانت
من بعد ستين سنة الأمة فيها صامت
أوباما قام اتنفض وخاف من التحذير
قال بداية الخطر شاف النهاية حانت
***
تسلم ايديك يابطل ياللى أخدت التار
ياللى حرقت العلم وهدمت الأسوار
حررت شلت العفن وبديت لنا التنوير
يسلم أبوك اللى ربى وست كل الدار

مجروح يا أغلى وطن بايدين ولاد الإيه
تلاتين سنة م الألم وإحنا جوه التيه
بحكومه متشكله باشا وبيه وأمير
بكوا والله الوطن ولا حزنوا مره عليه
***
أنا لما سيفى انكسر بإيدين ولاد الايه
ناديت رب السما طهرنى م اللى أنا فيه
جاوب على بمطر وملايكه جايه تطير
صحيت سمعت الخبر سقط النظام والبيه

مسطول راح التحرير فاق من السطله
لحظة ماشاف الألوف فى الميدان شاكيه
رفع بايده العلم والهتاف تكبير
يامصر كلى ندم هوهبلك العافيه
***
لما الفلول إبتدت تعمل لها أحزاب
نادانى سن القلم الهم لسه ماغاب
إكتب وصحى الهمم من صغير وكبير
ليعودوا للتزوير وحياتنا تبقى هباب

رقصت عيدان الغلة وابيضت الجلابية
والأرض لبست خضار والزرعة حلوة عفيه
أنا بإسم كل البشر بأقدم التباشير
مليون تحية وسلام للثورة الشعبية
***
معلوم لكل البشر الإسم فى القرآن
أرض أمان للبشر والنيل هبه وعنوان
حاضن تراب زرعها م الجنة جاى بخير
دا مهما زرعوا فتن محروسة م الديان

على قلب امة اتوجع صرخت الميادين
ضد نظام الخدع وسلق القوانين
قالوا كفايه ألم صبرنا والله كتير
الجمعة هى الأخيره ارحل بلا تأبين
***
الرقص جوه البلد بقى له تركيبه
بعد مارسم الولد يورث الشيبه
الأم كانت السند ولوبى له تأثير
الثورة قامت اتسجن اللوبى والشيبه

سألونى يوم عنها قلت دى حكاية
تاريخها دايما شرف للدنيا دى مراية
كنانة طول عمرها غنولها ياما كتير
دم الشهيد كان ليها موال وغنوايه
***
فى العباسية ابتدت الفتنة ضد الجيش
بإيدين شباب بلطجى ذاده حبوب وحشيش
زرعوا رعب وخوف وحرقوا ياما كتير
قلت أجندت عمل يشهد عليها الفيش

ماسبيروا بكى م الألم وصرخ فى كل الناس
الوحدة هى الأمل إوعوا من الوسواس
بكفايه تلاتين سنة زرعوا مابينا كتير
فتن سقتنا ألم والشعب ياما إنداس
***
علمت ابنى حامد المعنى فى الثورة
وازاى يحب الوطن وازاى يكون ثورة
وف ليلة جانى وقال الأقصى بينا أسير
حلفت الف يمين لنطهره بثورة