طول عمرى عايش ع الهامش

ببص على مصر بعينى

مابين ترابها وسماها

أمواج تشيلنى وترمينى

بايديا قلمى وأوراقى

مشتاق للحظة تنادينى

أرسمها جوه صفحاتى

يمكن تحرر دواوينى

... تعبت والله ياخلق ياهو

واليوم خلاص أنا هتكلم

وأهجى اللى بعنا وألعن أبوه

وأكتب وارسم والون

وارفع شعار الحرية

واكتب اغانى وطنية

واغنى لاجلك يابهية

عايزين رياسة مدنية

بكفاية ياما سنين ضاعت

هدموكى والله م علوكى

والثورة قامت على شانك

ضد اللى باعنى وباعوكى

الفرحة لمعت بعيونك

والشمس عادت لسماكى

وبرغم عيشى على الهامش

مش هنسى يااما اللى خانوكى

هكتب واغنى فى الميادين

واحكى حكايتك بحروفى

وانفض همومك بايديا

خلاص ياسمرة مات خوفى

من النهاردة هكون ليكى

سلاح ودرع هلال وصليب

وحدة صفوفنا هتفديك

ليوم ما شمس الدنيا تغيب

ده عهد كل المصريين

من الفراعنة ليوم الدين

ومهما طال دمع عنيك

الفتح جاى معاه حطين

خلاص ياسمرة صحيت م النوم

من النهاردة هقوم وهقول

عايزين رياسة مدنية