رشوا الملح سبع مرات

لفوا ودوروا سبع لفات

شفنا بنات حلاوتهم ياما

وبعد جودي ماشفنا بنات

العاشر صبحًا من مايو

البساتين صحت أزهارها

جودي نادت ياللا تعالوا

جيالكوا الدنيا أنورها

هاملى البيت لعب وحاجات

هجري وأنط مع الصحبات

عايزه ياماما توكة ف شعري

هات ياسي بابا المصروف هات

زي سفينة نوح مشينا

على جودي رسيت مراسينا

الدنيا بتحلى قوي لينا

لو عين جودي جت ف عنينا

راح تبقى كبيرة لاخواتها

 وجوه الفصل من الشاطرات

يا عيون بابا وروح روح ماما

وعيوننا يا أحلى الحلوات