العمر انتـــــهى......... جــــوه الأتوبيــــس
بالدم ارتــــوى......... حلم ف كراريـــــس

بيعلموه القرايـــة........والخط والحســـاب
وتاني قول ورايـا...... وعينك ع الكتــــاب
يصحى الصبح بدرى.. البيت يصحى معــاه
والوقت يعدي يجري.. فيه قلوب بتستنـــاه
عملت إيه النهارده.....حليت وكنت كويس
ولا شغل النمــــارده...أنا هســأل المدرس
إتغدى وحل الواجب.. والعب حبة ونـــــام
شاورلي وانت راكب وقول ياماما ســـلام
شاور آخر سـلام.... وضحك ضحكة جنان
وودع الأيــــــــام.....ولا عـــدى المزلقان
مات الحلـم ومات.... قلوب كانت عايشاه
ومهما الوقت فات... أبدًا مش راح تنساه

والحلم انتـهى .............والجاي كوابيس 
والحزن ابتــدا............ بقطر فى أتوبيس