هذه بعض مشاكل التعليم الفني

  الساده القيادات اقرؤوا المنشور للاخر ومحتاج تعليقكم

هذه بعض مشاكل التعليم الفني اتمني من حضراتكم جميعا لو نسيت حاجه تزودوني من خبراتكم وتبقي في التعليقات لحضراتكم
1- الاميه بالنسبه للقراءه والكتابه بالنسبه لعدد كبير من الطلبه وهناك نسبه كبيره من الطلبه لاتعرف القراءه والكتابه ويعتمدون علي زملائهم في الكتابه لهم في الامتحانات
2- الغاء قبول طلبه الدمج مع الطلبه المنتظمين لكن يتم قبولهم مع طلبه المهني وعمل امتحانات حقيقيه مش كل زميله ادربت ورجعت من التدريب تقول قالولنا في التدريب طلبه الدمج تنجح حتي لو ماكتبوش انتوا تقوموا بالواجب مع الطلبه وتنجحوهم نزل الكلام عليا من الزميله كالصاعقه وطبعا داخل الفصل مش عارف اسيطر عليهم وماسك اعصابي بالعافيه لدرجه ان عمري في حياتي ماغبت عن حصصي بقالي اسبوعين بغيب للهروب من التصادم لان الكل اجمع علي نجاحهم حتي لو ماكتبوش والواحد باقي له ايام قليله علي المعاش بقول ينتهوا بسرعه واخرج معاش علي خير
3-البلطجه وعدم الاحترام وضعف اللوائح المنظمه للطلبه داخل المدارس(سلوك البعض منهم متدني والسبب لائحه الانضباط) وتفعيل مبادره الكشف على المخدرات علي الطلبه والمعلمين ومنع تواجد المحمول لانه اصبح وجووده شئ مضر اكثر من نافعه حتي استخداماته اصبحت عكسيه
4-تفعيل حرمان المتجاوزين في ايام الغياب ودفع مبالغ عاليه لااعاده القيد ولتكن 5000 جنيه ويكون اعاده القيد في الدور الثاني اهو احسن من المحامي اللي بيدخل الطلبه غصبن عننا بحكم قضائي وبياخد 10000 جنيه يعني يخش الامتحانات في الدور الثاني بطريقتنا احنا وذلك لكي تنتظم الطلبه وتحافظ علي غيابهم والتزامهم
5- الغاء الجدارات لانها لاتنطبق مع الواقع المصري وثبت فشلها من حيث ضعف المعلومات العلميه داخل التخصص ومافيش خامات يقوم الطلبه بتنفيذ ماتقوم به خاصه بالمناهج المقرره عليهم
لدرجه ان 90٪ من الطلبه يقوم بتنفيذ المنتج عند صنايعيه خارج المدرسه وقولنا مرارا وتكررا اعملوا امتحانات للعملي في النقل وتقوم الطالبه او الطالب بعمل المنتج من اوله لاخره وتكييسه كما خطط للجدارات وقت اول سمعنا له لكن دلوقتي الطلبه الترزي خارج المدرسه بيعمل المنتج والمحقق الخارجي يحضر ويقول تمام واهو بنضحك كلنا علي بعضنا البعض وكله بيقول تمام يافندم واهو ملايين بتتفرق وبتتصرف اونطه والمحصله صفر
6- كثير من المناهج لايوجد لها ماكينات بالعملي يعني الطلبه بتدرس نظري فقط يعني شغلهم علي الورق فقط مع ان سوق العمل اللي شغال فيه ماكينات دائري لكن لاتوجد بالمدارس اي ماكينه كيف يتعلم الطلبه وكيف يمتحنون علشان كده بنقول احيانا وخصوصا علي قد معلوماتي قسم التريكو امتحاناته بعيد عن الماكينات المقرره عليهم يبقي نجيب ماكينات حديثه او اتفاقيات مع مصانع يتم فيها العملي
7- ربط المناهج بسوق العمل وتحديث الاجهزه والماكينات وتدريب الطلبه والمعلمين تدريب صيفي داخل المصانع مده كبيره باجر بالاتفاق مع رجال الأعمال واصحاب المصانع لان الجدارات كشفت ضعف الناحيه المهاريه للمعلمين قبل الطلبه علشان كده بيهربوا الطلبه للترزي يعمل لهم شغلهم ونفس الكلام لتخصصات اخري
8- الاهتمام بتخفيض تنسيق القبول بالجامعات والمعاهد والكليات التكنولوجية ماينفعش ان يكون دخول الكليه 97% يعني كل سنه يخرج 750 الف طالب وبص علي المقبولين في الجامعات مش المعاهد فوق المتوسط هتلاقيهم لايتعدوا 5 الالاف طالب
9- مراجعه كل برامج التدريب والمنظمات والدول المانحة لاانها فنكوش وماهي الا اداه لمعرفه كل مايوجد علي ارض مصر من بيانات وداتا كامله حتي تعين القيادات احيانا من خلالهم كما تم مع مستشارين واخذوا بعض اللي كانوا بيدربوا وخلوهم اخذوا اجازات رعايه اسره واشتغلوا عندهم بمرتبات ضخمه ويعتبر تدريبهم ماهو الا فسحه وفنكوش من فناكيش التربيه والتعليم بدليل ذهاب احد الزملاء المديرين للتدريب ولما راح مره اخري قال للمدربه ان المحاضره ده اخذها من قبل في تدريب سابق مرتين ونفس الكلام وفي الاخر قال المهم المصروف اللي بيتاخذ والوجبه والفسحه والنوم احيانا في الفنادق حتي القائمين علي التدريبات عندما يكون اللي ماسك التدريب فكره احسن من رئيسه في الاكاديميه تقوم بخلق مشكله معاها وتستبعدها وهذا ماحصل مع كذا زميله ماعندناش اسلوب تقبل راي من هو اصغر مني في الكرسي ولولا حبي لشخص معين كنت فضحت الدنيا باللي بيحدث في الاكاديميه
10- ماذا استفاد التعليم الفني من سفر بعض القيادات غير المنظره والصور والمعلومات التي اكتسبوها لنفسهم ولم يقدموا شئ للتعليم الفني وده لضعف الامكانيات لتنفيذ مارؤوه وتعلموه كما حدث مع بعض مديري عموم التعليم الفني لما راحوا اليابان وغيرها
11- الاهتمام بالوسائل التعليمية الحديثه وتحديث الماكينات ومواكبه سوق العمل وتحديث المناهج بالرجوع للمناهج القديمه والابتعاد عن فنكوش التكنولوجيا لان كثيرمن الطلبه لاتحمل موبايل لفقرهم حتي لو معاه موبايل فهو يعلم يشغله ويتفرج علي اماكن معينه وياريت يتم تحويل المدارس لمنشئات انتاجيه تنافس في السوق المصري وتحد من الاستيراد وازاله بعض اللوائح المعرقله لمشروع راس المال وانشاء بنك للتربيه والتعليم بدل ماكل البنوك واكله علي قفا التربيه والتعليم عيش
12 - تدريب القيادات علي المنافسه في السوق المصري وظهور منتجات لهم بديلا عن المستورد وتشغيل الماكينات اللي واقفه بالمدارس وتعد بالمليارات واقفه بدون عمل واخرهم ماكينات النسيج بالملايين في القناطر وبعض المدارس الصناعيه الاخري وغيرها كثير من التخصصات
13- عمل اداره تربط بين رجال الأعمال واصحاب المصانع والمستوردين. واظن التجربه نجحت عندما ارتفع الدولار لجا احد المستوردين وعمل مرايل مطبخ في احد مدارس شبرا الخيمة ونجحت الفكره
14- زياده حصص العملي والغاء حصص الكيمياء والدراسات والاكتفاء بالعربي والانجليزي ومواد التخصص والعملي مع تخفيف مناهج المواد الثقافيه لاانها لاتناسب المستوي الاستيعابي لطالب الفني ويكون عدد الطلبه لايتعدي 40طالب للفصل الواحد ونرجع زي التدريب المهني بتاع زمان اهتمامهم بالانتاج داخل المصانع
15-- رجوع منصب ناظر المدرسة لاانه اليد اليمني لمدير المدرسه مع رجوع حافز الاداء وتمييز المديرين لاانه الان هم متميزيين بكميه المشاكل والجزاءات وفيه منهم مايهرب من اداره المدرسه واخرهم مدير مدرستي نط من المركب وقال مش لاعب لمجرد ان بعض الهلافيت مشيوا بورقه وقالوا مش عاوزينه والان الدنيا وقعت تماما والهلافيت مسكوا في خناق بعض وايضا خوف زوجته عليه اني اجوزه الثانيه من دمنهور لما لقيته ماشي معاي هرب من المدرسه وجري مع انه حبيبي لكن الجري نصف المجدعه مع انه سد نفسنا عن الشغل بعد مشيه
16- الغاء بعض التخصصات التي لايوجد من ورائها تفعيل ولا انها تنفع بحاجه وانشاء تخصصات جديدة تناسب سوق العمل ويتم استيعاب الطلبه من خلالها كالالعاب الالكترونيه ولعب الاطفال واقسام للطائرات المسيره وكل ماهو حديث
17- تسهيل فتح فصول داخل المصانع وازاله العوائق التي تسبب انتشارها وعمل بروتكولات تعاون بين التعليم الفني والمصانع لتدريب المعلمين والطلبه علي احدث خطوط الانتاج
18- الغاء بند اعاده القيد وجعلها 5000 جنيه مادام هناك استهتار من الطلبه وتبقي هذه اللوائح من اول العام علشان الطالب يعرف ان اعاده القيد هتتعمل بكذا
19- محاوله استغلال اقسام السيارات بعمل بروتوكلات بينهم وبين شركات السيارات بعمل مركز صيانه واحد لكل شركه في محافظه هندرب الطلبه وهنزود دخل الوزاره والمعلمين والطلبه زي شركه سوزوكي وتيوتا ونيسان وخلافه
20- عدم تقسيم حصص العملي في اليوم يعني الطالب يدخل العملي من اول اليوم لااخره ولايتخلله حصص نظري ونشوف انتاجه اخر اليوم
21- منع الغش وتغيير فكر المعلم والطالب بمقوله كل من حضر عزاء يعني كل من حضر نجح ونتخلص من عمليه تظبيط الورق لاانها سبب فساد المنظومه سواء لبعض القيادات ويتبعا الموظفين الصغار
22- تنميه الصناعات الحرفيه واليدويه بانشاء تخصصات لهم ومساعدتهم في عمل ورش صغيره بالتعاون مع اداره يطلق اداره المشروعات الصغيرة ملحقه بالتعليم الفني
23- انشاء مصانع ومزارع تتبع التعليم الفني وتحويل التعليم الفني لجهات تدريبيه وانتاجيه زي القوات المسلحة ويتعمل من خلال اقسام العماره والمعدنيه مباني وكباري والتعليم الزراعي مزارع مواشي وطيور وسمك وتحديث المناهج بااستمرار
24- عمل معرض دائم في كل اداره تعليميه متعدد الادوار لعرض منتجات التعليم الفني ونسيبنا من المعارض السنويه للمظهره وبس وتصبح لعرض جميع منتجات ومدارس التعليم الفني زي مامصلحه السجون بتعمل معارض داخل سوق القاهره الدولي
25-عمل مزارع لزرع محصول صناعه الورق ويتبعا مصانع ومطابع لان هنوفر المنتج وموجود السوق اللي هوزع فيه اي دوله لما بتعمل مشروع بتدور علي الخامه وده هنزرعها وبتدور علي الايدي العامله وده مجانا وبتدور علي التسويق ومنتجاتنا كلها بتعتمد علي الورق ونبطل استيراد
26-نروح هيئه الاستثمار والاستيراد ونشوف ايه اللي بنستورده زي لعب الاطفال واجهزه الموبايل والادوات الكتابيه وكل صناعه تبقي في مدرسه وتقوم المدرسه كلها بتصنيع منتجات ونتعاقد مع مصانع الصين واندونيسيا والبرازيل تكون مدارس مصر فروع لهم بالشرق الاوسط هنوفر دولار وهنصدر ونشغل الايدي العامله
27-التربيه والتعليم تزرع اولا 100000 فدان في مزارع متعدده ويكون معاها مصانع تعتمد علي مايتم زراعته وتكون الدراسه داخليه ويكون لهم مرتب شهري مع وعوود باسلوب معين كل طالب ياخذ كام فدان بشروط معينه واسلوب معين
28- اعطاء اجر مناسب للمعلمين علشان 99٪ منهم بيطلع يشتغل شغلانه ثانيه وثالثه علشان يقدر يكفي بيته واولاده فبيروح لشغله الاساسي في التربيه والتعليم نايم علي نفسه فلازم ياخد اجر مناسب وهما مكتفيين بتعديل اساسي 2014 الي 2025 وكمان الامتحانات تعديل اجورها لانهم بيدفعوا من جيوبهم يعني يسيب شغله اللي بيزوده علي مرتبه ويسافر وينضرب احيانا في اللجان وكمان يدفع من جيبه انا شوفت بعيني زمايل وزميلات بتعرض من الف جنيه الي خمسه الالاف جنيه للي ياخد جواب الملاحظه بتاعه بجد مهزله والمسؤولين عارفين كل حاجه ابسط حاجه طلبتها ان بتوع العسكريه مش الشرطه هما اللي يامنوا اللجان ولا يوجد من يستجيب لان الشرطه مش متواجده بالشكل المثالي
اخيرا اتمني ان ننتهي من مقوله اهل الثقه ونستعين بااهل الخبره وعندي معلومات مؤكده من جهات عليا اثق فيها سيتم اقاله مسؤولين عن التعليم الفني قريبا جدا
29- إلغاء التطوير الجديد بمايسمي شهادة العام الواحد والعامين لان الطالب هيخرج للشارع لان قانون العمل يمنع الشخص من العمل لسن اقل من 18 سنه يبقي كده بنخرج الطالب للشارع وبعدين مافيش تنزيل من سن الجيش يعني 3 سنوات زيه زي الاعداديه وليس له تكمله في المعاهد والكليات حتي تكمله البكالوريا لم تتضح حتي الان
30- عاوزين مدن كبيره زراعيه صناعيه لطلبه التعليم الفني لان حضراتكم عارفين انها أيدي عامله مجانيه ويكون لهم سكن واكل وخلافه
31- تغيير استراتيجية الامتحانات من اول التوزيع لغايه النتيجة كل حاجه عاوزه تتغير لان بها كثير من العوار
سامح حماد امين فتح الباب
كبير معلمين بمدرسه بنها الفنيه بنات
قسم نسيج بقسم التريكو