authentication required

ثورة التحرير

للشاعر المصري / رشاد هويدي

شاعر الوادي

بعد التحية والسلام

على أمنا مصر الحبيبة

حضنك يا أمي فيه أمان

وحنان وطيبة

نبدأ منين ؟!

أنا أصلي تاه مني الكلام

واتلخبطت كل الحروف

نبدأ منين ؟!

من منوف ؟!

ولا نبدأ م الميدان ؟!

م إسكندرية والسويس ؟!

م الغردقة وأسوان ؟!

كل الأماكن في البلد

بتعاني من سوء النظام

والفقر والجوع والمرض

نفس الآلام

وشعب مصر الجمل

ياما عانى واحتمل

كل الفساد

والاضطهاد

والكيل طفح والظلم زاد

فجرنا أصبح سراب

وحلمنا لو نرجع تراب

وقالوا عاشقين الانكسار

والرئيس فرعون مازال

وإننا الشعب الأليف

اللي بيرضى بأي حال

واللي بيمشي ع الرصيف

لاجل ما يربي العيال

بدخل معدوم أو ضعيف

فقر دم وعيشة هم

وشعب مش لاقي الرغيف

والمهم يعيش نظيف !!

باختصار

الكل أجمع إننا

مغلوبين على أمرنا

بنقول آمين

حتى للظلم المبين

وإن مالناش اعتبار

والضغط ولد الانفجار

والشعب ثار

والشباب

اللي قالوا إنهم

في بلدنا متاخدين غياب

وهم والتوهان صحاب

النصر كان من حقهم

هزموا الصعاب

ورجعوا لنا حياة وروح

بقى صوتنا مش مبحوح

زعق الجميع بالأه

من الألم جواه

وبثورة التحرير

هز ميدان تحرير

وكمان في كل مكان

بدون زعيم وكبير

لا جماعة ولا أحزاب

ولا جبهة التغيير

مادد إيديه بسلام

طالب حياة

ورافض استسلام

للذل والمعاناة

وعرف طريقه خلاص

يا يموت شهيد تحرير

يا يفوز بنور وخلاص

وبدا من بعيد فجرنا

ومعاه بشارة نصر

قربنا نمسك حلمنا

ورجعنا تاني لمصر

لكن في وسط الفرح

ظهر العدو حبيب

وقلب مصر اتجرح

بأمر فيه ترتيب

فجأة السجون تتفتح

وأمن البلد بيغيب

لا في عسكري وأمين

ولا خفير اتوجد

واتروعوا الآمنين

سرقة وحرايق في البلد

وجيشنا حصن حصين

وشعب مصر الأسد

يحمي تاريخ وعرين

****

وفي الشدة بتبان الأمور

والصورة تبقى منورة

والخير بيظهر والشرور

ونشوف كمان المسخرة

الكل فكر وبغرور

مصر تحت السيطرة

واللي اللي بقى له دور

والقزم أصبح عنترة

والكل بان

اللي بيحب البلد

والألعبان

وعرفنا مين مصري أصيل

واللي مع حزب الشيطان

والعميل

واللي باع كل اللي كان

واللي طالب بالرحيل

وهو عينه ع المكان

واللي واللي كتير كتير

يلا نرجع للميدان

لاجل ترجع مصر بينا

تبقى أحسن م اللي كان

إيدنا في إيد بعضنا

ونرجم الشياطين

ورغم اختلاف رأينا

الكل مصريين

ما ناخدش أبدا أمرنا

من أمريكان أو صين ؟!

وندعي على ابننا

ونكره اللي يقول أمين

*********

وبدأنا نجني ثمار

حققنا صح نجاح

دخل الجميع في حوار

وهيبدأ الإصلاح

وبدأنا عهد جديد

بمحاكمة الفاسدين

وزرا ولص حديد

ولسه فيه تانيين

وحكم القضاء هيكون

نافذ بدون تدليس

هنعيش في ظل قانون

والشعب حقه يهيص

خيبنا كل ظنون

وقضينا ع التوريث

*****

ونعدل الدستور

ويتكتب في النور

ويكون لصالح مصر

ما نفصلوش بالزور

يضمن حقوق الناس

بالعدل مش بالجور

مش شلة فوق الراس

والشعب كله يغور !!

لازم العدالة تنتشر

والكل يبقى سواء

ونعيد كمان النظر

في معظم الأشياء

وعشان نعدي الخطر

نعرف منين الداء

ومين بمصر غدر

ونعرف الأعداء

ننهي الفساد والزور

ونراقب الأسعار

ونوزع بعدل أجور

ونفتح استثمار

لأجل البطالة تغور

ونعرف استقرار

نحمي رغيف العيش

وحرية التعبير

لكن لابد نعيش

من غير ما نؤذي الغير

ونقضي ع البلطجة

علشان نعيش في أمان

والشرطي يتغير

ويبقى جنتل مان

هل يا ترى باحلم

ولا في الإمكان ؟!!

*****

رشادهويدي

<!-- / message -->

 

elgendiart

  • Currently 31/5 Stars.
  • 1 2 3 4 5
11 تصويتات / 119 مشاهدة
نشرت فى 24 فبراير 2011 بواسطة elgendiart

ساحة النقاش

elgendiart

elgendiart
المدير العام ورئيس أدارة هيئة تحرير المجلة محمد نجيب الجندى ايطاليا »

السيرة الذاتية

تسجيل الدخول

عدد زيارات الموقع

106,659

اعلان اليوم

اعلان اليوم


للاعلان على مجلة أراء وافكار
رجاء الاتصال على العنوان التالى



[email protected]

[email protected]



Free Image Hosting at www.ImageShack.us
Free Image Hosting at www.ImageShack.us
Free Image Hosting at www.ImageShack.us