"هي خبطة كتف عشان تقول اعتذار
".. إرفع ضغطك فوق..إنت مصري
"واحدة ست راحت لمبارك السجن وقالتله منك لله قالها ليه؟.. قالتله انا بعت اللي ورايا واللي قدامي علشان ادّخل ابني كلية الشرطة و ما عرفتش قالها وايه يعني ما انا بعت البلد علشان اخلي ابني رئيس جمهورية وما عرفتش."
هكذا أبدى مواطن فيسبوكي رفضه التام لفكرة اعتذار الرئيس مبارك للشعب ورد الأموال التي حصل عليها مقابل العفو عنه، وذلك من خلال صفحة تحت عنوان "مش هنسامحك يامبارك ولا هنسامحك يا سوزان.. الاعتذار مرفوض" دشنها مجموعة من الشباب.
بينما على صفحة "حملة رفض اعتذار حسني مبارك"، يقول وائل شلتوت معلقا "الشعب اشتري حريته بس نسي ياخد الكتالوج و نازل لعب في كل الزراير."
وطالبت داليا سيد "بأن نقبل اعتذار الرئيس السابق مبارك في مقابل عودة الملايين المهربة وبعدها نسيب القضاء يحاكمه في القضايا التانية وأكيد هياخد إعدام".
لم يصدق محمد عبد المعبود، هذا الكلام حيث قال "وكمان نعفو عن العادلى وجمال وعلاء وسرور والشريف وندخل احنا بقى السجن".
وتتساءل صفحة" نحن لا نقبل اعتذار مبارك" يعني ايه جمهورية مصر العربية .. يعني اسرق و بعدين لما تتكشف رجع الفلوس:S:S:S".
وعلى الصفحة نفسها طالب وليد " اقبلوا اعتذار كل من فى سجون مصر ثم اخرجوهم واعفوا عنهم واغلقوا المحاكم ولنكتفى بلجنة اعتذارات."
ورغم جدية الموضوع إلا أن ذلك لم يمنع أن تكون التعليقات ساخرة من الموقف حيث تقول سلمى حجاب " احنا نقتل جمال ونحرق علاء ونسحل سوزان ونغرق أحفاده فى عبارة، ونعتذرله لو قبل اعتذارنا هنقبل اعتذاره".
يعدد أحمد توني للأعضاء النتائج التي أفرزها الحكم السابق في ظل قيادة مبارك وماما سوزان، حيث يقول " اللي ليه الحق يعتذر لك أبويا اللي مات بالسرطان وعمي اللي عنده فشل كلوي والتاني اللي عنده قرحه في المعده وابن خالي اللي الجهل مضيعه وأنا اللي مش عارف أتجوز ومستقبلي ضايع بين الممكن الذي أصبح مستحيل والسهل الذي اصبح يمتنع وجاري اللي بينازع في مستشفي الدولة لإنك واكل فلوس العلاج وبتوزعه علي حبايبك الأمريكان واليهود علشان يحاربوا إخواتنا وأهالينا وإحنا كمان اللي اتضربنا بالغاز المسيل اللي إنت شاريه من أمريكا وإسرائيل".
وردا على ما قالته صفحة " أنا مش آسف يا أسوأ حاكم لمصر".."يامبارك يامخلوع وقسما بالله رقبتك بكنوز الدنيا كلها..مش عايزين فلوسنا.. بالعمل والجهد حنعرف نجيبها تانى..الفلوس بتروح وتيجى بس كرامتنا مش حتروح تانى" قالت منى حسين " يا جماعة هيطلع فى الاخر المسيخ الدجال محدش مصدقنى".
الحديث عن خطاب للرئيس السابق حسني مبارك يعتذر فيه للشعب المصري، دفع أعضاء الصفحة للترحم على الثورة حيث يقول محمد حسين:"سلطوا البلطجية وما فلحتوش انفلات أمنى..و انتم ما سلمتوش..فتنة طائفية..و ما أدرتوش..أزمة سولار من صنعكوا برده ما نفعتوش وأنبوبة البوتاجاز و ما تلهيتوش.. يا تره فى ايه تانى حاتعملوه ما عملتهوش؟ ولو الشعب كله مات.. برده عن المخلوع ما حا نعفوش.. كفاية سوزان وسرور و زكريا وبكرامة الشعب ما تستهونوش" هذا ما كتبه ناصر أحمد على صفحة "مش هنسامحك يامبارك ولا هنسامحك ياسوزان الاعتذار مرفوض".
وتناقلت عدد من الصفحات الشعر العامي "آسف على الزحمه، ولا على 80 جنيه لحمة، ولا على ام ابنها مات فى عبارة, ولا على مهندس شغال بواب عمارة, ولا على قطر سكة حديد, ولا على كنيسه اتفجرت فى ليلة عيد, ولا على نهبك وظلمك وقهرك, ولا على سرورك وحبيبك وعادلك, ولا على شهدا كانوا بيهتفوا بوطنية عيش حرية عدالة اجتماعية".
وكان مصطفى محمود أكثر قوة في تعليقه معبرا عن رأي الشارع المصري يقول" اعتذار ايه هو فاكر نفسه خبط الشعب فى كتفه وهو ماشى من غير ما يقصد ولا ايه دة قتل الشعب وسرقه ودمرة".
لم يكن فادي غائبا عن المشهد السياسي ، حيث يقول " بعد خروج سوزان واحتمال سفر مبارك المانيا للعلاج والاستعباط اللي حاصل بقي شعارنا،
"ارفع ضغطك فوق .. إنت مصري ".
ساحة النقاش