وحشتينى يا ست الكل

وحشنى حضنك الدافى

وجوه القلب حنيه علينا تتطل

تعطرنا بنسيم الصبح ورد وفل

وشنطة مدرسة جاهزة وكيس الاكل

لو الايام ترجعنى ما افارق وشك الصافى

يا جنة تحت اقدامك ومفروشة

وسندس والشجر رمان ومعروشة

بنات الحور حرير شفاف بلا كوشة

كله برضاكى ودعوتك بلسم للجروح شافى

لو الايام تكون عيدك

ما تكفى لمسه من ايدك

ودغدغتك وانا وليدك

لو اقدر ارد ه كان شلتك سنين العمر فى كتافى

ولا سنينك هاجيبهالك

وانا عارفك ولا هامك

يضيع العمر علشانى

كتير شفتك وانا عيان بتصحى والعيون غافية

ولما قلت انا مسافر

هدوس الدنيا وهعافر

واجيبلك م الحرير فستان

لقيت الحزن فى عينيكى ضحكتى والدموع خافية

وكل دقيقة بتعدى

على واحنا فى الغربة

هموم الدنيا فوق خدى

جذورها من عنا فراقك فروعها ضلة مش كافية

كل يوم يا امى وانت

شراعى وسكنى ومدينتى

حضنك دوم يغطينى

يبارك فى الحنان ربى ويديكى من العافية