جارى التحميل
استخدم زر ESC أو رجوع للعودة
لو ظالمة يكون حضنك برد وسلام
انا اللى سلبتك الاحلام
انا القاسى انا السجان
انا كل اللى واجعينك بكل الام
***********
انا راجع اكون ملكك
ولو كافر هنا الاسلام
ولو عاصى هكون عبدك
وهدفع عمرى للايتام
ولو حابه اكون جنبك
شهيد او عزوة للايام
*********
وهرفض خيانتى
بصبرى وسكوتى
وهصرخ وازلزل
واعيط واولول
وما دمتى راضية
معاكى لموتى
ولو كنتى ستى
هاكون الغلام
ولو كنت رتبة
اقف لك تمام
فداكى السعادة
فداكى الالام
ولو كنت اقدر
اطير او ارفرف
وساعة ما تخنق
حمامة سلام
************
ولو كنتى بحرى
وفيكى شراعى
واجدف بحبى
وايدى ودراعى
ولو تيجى موجة
راح افرد جناحى
يضلل يحابى
يشيلك ...يراعى
ولو كنتى كلمة
تكونى الكتاب
ولو تيجى صفحة
غشيمة وهباب
ورمزك يلاقى
شتيمة وسباب
وطفلك بيرضع
زبالة وتراب
وعينك بتدمع
شايفة الصعاب
راح امسح بدمى
واكتم فى همى
واعيش رغم جوعى
واشرب فى عطشى
رزاز السراب
***********
ولو كنتى جنة
هكون الشهيد
اللى بييجى
قتيلك سعيد
ولكن فى مهرك
دا كاسر حديد
وساعة ما تطلب
دا فارس عنيد
ويلقى نصيبه
بصحبة حبيبه
نبيه وطبيبه
وساعة ما يدخل
تقف له الملائكة
تحية وسلام
