الضلمـة قـــــرار 

***********************
أنا مش نزار

و لا ضفر من رجل الفاجومي

فى الثوره طار

أنا كوكتيل عشق حلاوته مرار

بلقيس ندهتنى بكبرياء

رديت وجع

عينى ع الجدع فى شراك وجع

و اللهجه فضحت بدله خدها إيجار قديم

تار بايت بينه و بين جلابية عبد الجبار

عصير كتب

فى حضاره عماله تحتضر

منديل محلاوى إتعصر

نزل ثوار

العندليب علمنى إيه معنى الهوا

و جويده فى الدم إستعمار

كان كل حلمى ديوان يترجم لغوتى

دليل يقول للناس على طيف

كان حلمه نهار

و صراخ صبى

يقلق منامى و يعتذر

على غربه طالت بينه و بين غريب الدار

مفطوم على وداع الأحبه ف سكتى

و جينات أيوب بتصبر ليل و بتطفى نهار

بين توبه حالفه ما تتقبل
و ذنوب من نار
حيران بين شطين و موانى
و زمن غدار
الكلمه أمانه و عمرى ما خونت وعودى ليها
لكن الموجود مش دايما زاده قد المشوار
ورده و حرموها من ألوانها
من أشجانها
غصبوها فى الوهم تكون صبار
كان حلمى ألملم تفاصيل روح
و أزرعها فى سطر
حبيبتى مدار
ما حلمتش كلمتى يسمعها و يقراها كتير
بس الفوازير
عقدت نيه تهد هدايتى
و تفوتنى ضرير
سرقوا العكاز من غير ما يشوفهم
أصله ضرير
و الضلمه قرار