ورينى وشك
قبل ما تنطق أسمى بحرف
أقرا عيونك أقرا ملامحك
قبل ما ودنى تسمع حرف
لانا محتاج تسأل عن حالى
ولا عن بلدى
اللى انتا شايفها
فى اسوأ ظرف
عشت سنين العمر بحاله
أسمع كلمة غُض الطرف
عيش فيها رايق
ولا تضايق
اللى يعوزو الباشا بالحرف
طنش.. صهين... سوح
حط آمالك جوه الظرف
واكتب ع المظروف من بره
من تاريخ راجع للخلف
واللى ف باله دا غصب عنك
يبقالو معنى ويبقالو صرف
فلا تتعصب ولا تتعفرت
تمنك عند حكومتك ظرف
ولا تفرقش مت لوحدك
ولا معاك كان ييجى ميت ألف
ما حنا الشعب المتهان جدا
كل حياته مقضيها زحف
حتى فى لقمة عيشو وعرقه
ولا كرامته الملهوفه لهف
دوله اهى ماشيه بالمقلوب
كل خطاها ضعف فى ضعف
لما بقينا فى وسط العالم
دوله بتجرى قوام للخلف
كان البطش فى زمن الماضى
مهما اشتد عليك له سقف
أما فى زمن الحزب الحاكم
نفسه يكون الشعب دا وقف
كأنه مخبى فى السرداب
شعب مهاود دايخ جاهز
عمره ما ينطق كلمة لأ
ولا بيهمه جرح كرامه
ولا بتهزه بحور النزف
سينا بيسلخوا جلدها عنا
ولا يتحرك ليهم طرف
ناس تشبهنا ولا تشبهنا
ايدى وايدك رجل وكف
لكن فى الوطنيه استنى
ورقه رخيصه
فى قلب ملف
فكره فى دوله تشبه دوله
ولا يحكمها غير العرف
واللى يقولو كبير القعده
يمشى قانون على اكبر بأف
يشبه يومى طعم إمبارح
مر مراره فوق الوصف
آهه بعمر سنين مطحونه
حتى النيل بتاريخه بيغضب
يظهر ناوى يعود للخلف
علشان شعبه صامت جدا
ولا يفهمشى لغة الزحف
ثور واتمرد مبقاش فاضل
غير الرمله نسفها سف
إياك فاكر ان حكومتك
خشنه قويه وتعمل وقف
للى بيحصل من أثيوبيا
تحمر عينها أسود صعرانه
بزأره تخلى قرود اثيوبيا
تعود للخف
إنسى ياصاحبى
حكومتك ناعمه
فاضيه تلمع فى المسئول
وتخسف باللى يعارض خسف
وانتا يا شعبى خليك صامت
نام وارتاح
إما تعيش بكرامه وحر
أو تتحمل ولا تنطقش
بكلمة اوف
