#‏أولى‬ جامعة
قصة شعرية

أولى جامعة
فرقة أولى-كلية تجارة
زي عادتي
أخدت ورقي
وخدت نفسي
وسندت ضهري ع السلالم
لسه لامم
جوي مني كلمتين
وسط كل الدفعة اسمي
أمير أنا للعاشقين
كل كلمة حب إنكتبت لبنت
كنت أنا
أي كلمة حننت قلب جامد
حروفها كات
من قلبي أنا
لما بكتب
كأني أنا بكتبلها
-كلمتيها
-لسه رايحة
-إيه مأخر
-برتب كل جملي وإزاي هخشلها-بفكر
و أنا رايحة حالا
-مستني ردك
-قلبي عندك
-قد إيه بشتقلها
ساعة عدت
لقيتها جاية
حبيبتي هيا بلحمها
-إزيك
-إزيك إنت-عايزة خدمة
-إنتي طبعا تؤمري
-بحب واحد
لكني مش قادرة أصارحه
-إيه بيمنع؟؟؟؟
-خجلي ديما
بينشف الكلمة في حلقي
-وإيه حلولك
-عايزة أكتبله مشاعري
كل حرف فيها تنطق حبي ليه
عايزه لما تقراه عنيه قلبه يرجف
يعرف إني عاشقة قربه قد إيه
قلبي الصغنن بيرقص من كلامها
من نظرة العشق في عنيها
أكيد صاحبتها كلمتها
فجتني جري
أكيد وطبعا
خجلها إللي بيعصرها عصر
منعها تنطق
بتحبني
والجواب أكيد عشاني
حلمي بدأت ألقاه حقيقة
بتبتدي
وبتتولد
بعد المخاط
أجمل حروف الحب خطتها إيديا
أجمل كلام حاضن حنين
كل إللي مكبوت من سنين
حطه قلمي
وإتحفر وسط السطور
لاول مرة بكتب أنا مشاعرها ليا
لاول مرة بوصف إللي فيها -ليا
وهي
واقفة قصادي بتبتسم
وأنا كل نبض قلبي
بين عنيها بيترسم
-أدي الجواب
-متشكرة
لحظة و فرت في السطور
الضحكة مدت
و الكون ضحك
أكيد هتقولي حالا
الجواب ده كله ليك
طبقت فيه وبهدوء
كلها بتنطق بذوق
و إدورت
-خدي رايحة فين؟؟؟
-رايحة أدهوله
مستعجله
نفسي يعرف قد إيه أنا بعشقه
ماتت عنيا
وقلبي واقف
ينتظر
أنا بحتضر
ماشيه ناحية صاحبي هاني
الجواب مكتوب ده ليه
أما أنا
فإسمي محمد
عاشق وميت
بس مش مأسوف عليه

محمد_صبري