دويتو بين الشاعرة المتميزة // لبوة مصطفي
وشاعر النيل الأسمر الشاعر // فرج البراهمي

الشاعر فرج البراهمي
(1) في عيد الحب انا استنيت
تهديني مكالمه أو ورده
لقيت خطك معايا مشغول
وقلت لنفسي مافيش فايده
عرفت الحب انا معاكي
وعشقت عيونك الشارده
حاولت معاك كام مره
لقيت قلبك ديما مشغول
وحرارة حبك مش واردة

@@@@@@@@@@

الشاعرة لبوة مصطفى
(1)بخبي الحب جوا الروح
و بداري عليه برمش العين
يشوفوه الناس ده مش مسموح
ليحسدونا احنا الاتنين
خليه في القلب مش مفضوح
وانت فاكرني ناسية الوعدين
وعدك ليا مش هتروح
ولا تفترقش الإيدين
ووعدي اداويلك الجروح
و اخبيك جواتي بين ضلعين ...

@@@@@@@@@@

الشاعر فرج البراهمي
(2) حبي وحبك زي سفينه
أتمنيت تعبر بينا
لبر الشوق وتعدينا
بحلم وتتحقق كل امانينا

@@@@@@@@@@

الشاعرة لبوة مصطفى
(2) حبي وحبك نجمتين اتلاقو
لونو للورد أوراقو
سهرو الليل و ياعشاقو
و علمونا حنين أشواقو

@@@@@@@@@@

الشاعر فرج البراهمي
(3) بيني وبينك باشتاق انا ليك
أشتاق اسمع صوتك
واجري عليك
بحلم حبيبي أرجع ليك

@@@@@@@@@@

الشاعرة لبوة مصطفى
(3) موطنك بين إيدا
و مستنيا ترجع ليا
ابوس الحب من جبينو
و احضن ايامي اللي جايا

@@@@@@@@@@@

الشاعر فرج البراهمي
(4) اكتر شئ بيعذبني سكوتك
رغم احساسي وحنيني لصوتك
رغم شعوري بدفي ايديك
عمر في يوم ما صعبت عليك

@@@@@@@@@@@

الشاعرة لبوة مصطفى
(4) سكوتي ما كنش فيوم عذاب
سكوتي ده لغة الأحباب
بص في عنيا هتقرا فيهم
لحيرتك الف جواب و جواب

@@@@@@@@@@@

الشاعر فرج البراهمي
(5) لسه بحس بهوا انفاسك
لسه بشوف كلام في عنيك
خلاص سلمت القلب ليك
لما قولت بخاف عليك

@@@@@@@@@@

الشاعرة لبوة مصطفى
(5) قلبك ده أمانة عندي
فرح الدنيا و حلمي الوردي
حبك ضيف جاني فمنامي
وانا للضيف صاينة عهدي

@@@@@@@@@@

الشاعر فرج البراهمي
(6) مش قادر انسي زمان
الي عدا والي كان
حقيقه كونتي أو خيال
قبلك عمري ماعرفت الامان

@@@@@@@@@

الشاعرة لبوة مصطفى
(6) ولا بقدر انسى اللي فات
عايشة جوا الذكريات
حلمنا هيفضل حقيقة
و هنلون بإدينا الحياة

@@@@@@@@

الشاعر فرج البراهمي
(7) ليه وفجأة من غير وداع
تنسي عمر بينا ضاع
ضاع معاكي بين ايديكي
كان هنايا والسلام

@@@@@@@@

الشاعرة لبوة مصطفى
(7) عمر ما انسى اللي راح
شيل الفكرة دي وارتاح
انت لسه جوا القلب
و السما لحبي ليك براح

@@@@@@@@

الشاعر فرج البراهمي
(8) انتي روحي وانتي عمري
انتي شمسي وانتي قمري
لا مش ممكن عني تغيبي
أطمني انتي قدري ونصيبي

@@@@@@@@

الشاعرة لبوة مصطفى
(8) أوعدك نفضل سوا
نمسك بإدينا الهوا
هندوس ع الصعب و نكمل
و الزمن لجروحنا دوا

@@@@@@@@