#‏لأني‬ حنين

لأني حنين
فبسكن سكة الأغراب
وأمد إيديا
وأطارد سحب دخان
بتغطي علي الوشوش
تكتب حروف غربة
بلا أسباب
وأحاول من الغبار أمسح
غباوة الزيف بتغطي
الدفا في العين
وأكشف من الحقيقة بلاد
وأشد الحيرة م الأوتاد
وأفك الأسر
وأبعتر من إيديا النور
يمسح من ضميرنا
ضباب
بيعشش
في فصول السنة الساكنة
و أعصر دقة في قلوبنا
من زمان صدت من الركنه
و أبيض تاني في وريدها
وأزيت
يمكن لحظة ما تنفعشي
فأبيت
ونشوف الشروق
وتاني إيدينا ماسكة
ف بعض
ولأني الحنين برضه
مينفعشي أترمي
في دولاب
أنا وطني النظرة
لما تمدلك
تشتاق
ولو تغرق في بحر عذاب
أنا المطلوق
لكن
مربوط في ريش الطير
منيش أملك
لكن أملك
نسمة وذكري
وفسيلة هتفضل
ترتوي وتصير غابات خضرا
هتسقيها بحاجات حلوة
و شريط ذكريات مره
ومهما تشد في جذوري
عشان أدبل
ومتشوفنيش
وماتحسش
برضه أنا هفضل
حنين يسري
و نسيم يكويك
لو تقدر تخنق الحنين بإيديك
هتهفهف عليك لحظة
تفكر فيا وتنادي
حنين القلب مايموتشي
‫