(لأجل اللقمة ماتبقي حلال )

شوفتي يادنيا إزاي أنا صابر 
وزي كتير متعلق فيكي 
بقالي سنين
زي الساقية ندور حواليكي 
ليل ونهار رايحين جايين
لأجل اللقمة ماتبقي حلال
أحسن من مد يادنيا إيدينا 
للي مايسوا 
والعين تدمع وتزيد قسوة
............................
حتي الواد حنتيره كمان
في رقبته كوم عيال
صبي قهوجي وخداه الحيره
طول اليوم ياعيني شغال
رايح جاي ...تشرب شاي
ولا أجبلك فنجان قهوه
واهي شغلانه
لأجل اللقمة ماتبقي حلال
أحسن من مد يادنيا إيدينا
للي مايسوا
والعين تدمع وتزيد قسوه
.............................
ولا الواد أبو حماد
شغال سمكري وكمان حداد
طول اليوم شايل المرزبه 
يضرب ضربه بعينه الحاده 
سبحان الله.... حاجه تجن 
رغم ياناس صغر السن
شفت الحديد بيخاف منه
طايع أمره .... يلين ويحن 
وبيتشكل زي ماعايز 
ربك سترها أكيد مش جايز 
وأهي شغلانه 
لأجل اللقمة ماتبقي حلال
أحسن من مد يادنيا إيدينا
للي مايسوا
والعين تدمع وتزيد قسوه
..........................
شوفتي يادنيا كتير زينا 
شقيان فيكي وإنتي تزلينا 
وأدينا صابرين ونقول تتعدل بكره
وبنتعشم أن الحال يتبدل يوم
ونعيش عيشه تبقي كريمه
وننسي هموم صبحت بالكوم
ورغم ده كله ..ماشي معاكي
بنيه سليمه ..آه يالئيمه