وجع الجراح

آه .....آه يا جدع
آه .....آه م الوجع
احكى وقول عن بلوتى
احكى وقول ياودع

ليه يا زمان جرحتنى
م الحب ليه حرمتنى
الكل داق طعم الهوى
وأنا الوحيد عذبتنى

أنا كنت بحلم بالغرام
مستنى نظره أو كلام
عشمتنى بليل الهوى
سهرتنى ما عرفت أنام

أنا اللى قلبى بين ايديك
وعنيه مشغوله بعنيك
بتفونى ليه وليلى الحزين
أنا والنجوم نترجى فيك

هو عشان انت القمر
تقسى على كل البشر
م تقولى فين وازاى وليه
قلبك كده أصبح حجر

هشكى لمين وهقول يا مين
بتبَكى ليه قلبى الحزين
د أنا قلبى مش ناقص جراح
وجع الجراح بكى السنين

عطشانه والمايه ف إيديك
نفسى أرتوى بنظره عنيك
هواك ف قلبى محيره
وأنا قلبى مش صعبان عليك

يا فرح غابت ضحتك
وحشانى والله محبتك
م تقولى راح فين الهوى
وفين يا فرحى سكتك

كلمات / رضا أبو الغيط

أعجبنيأعجبني ·