الى أرواح كل الشهداء الذين يصنعون المستقبل بدمائهم الطاهرة
الى كل الشهداء والى كل من سيستشهد فى سبيل نصرة الله والوطن
بسم الله الرحمن الرحيم
" ولاتحسبن الذين قتلوا فى سبيل الله
أمواتا بل أحياء عند ربهم يرزقون"
صدق الله العظيم
أخويا الشهيد 
كل عام بيجينا اسمك
ننتشى بروح الانتصار
نصر أكتوبر بداية
لألف نصر فى الانتظار
ناس بتحكى وناس بتسمع
عن بطولات فى المعارك
اللى خطط واللى حارب
المهم الكل شارك
وويا ذكرى النصر دايما
بافتكر أخويا الشهيد
اللى ضحى بعمره راضى
وعزز النصر المجيد
كنت لسه صبى صغير
ع الشباب يادوب بابص
كان أخويا طويل وجامد
زى أبطال القصص
لما يقرا تلاقى متعة
ف منظره وقت القراية
لما يكتب خط رقعة
مطبعة ف ايدة وحكاية
لما يلبس لبس عادى
كأنه قاعد للمراية
حاجة على رأى المثل
الولد ده ابن موت
لما يبقى شبه كامل
فى المزايا والصفات
لما راح الجيش وكنا
قبل اكتوبر بفترة
حالة الناس كات تبكى
م الهزيمة وعيشة مرة
ولما جه فى أول أجازة
نورت كل البلد
جى يأيف بدلة ميرى
وفى الايافة يتحسد
يوم سألنا عن سلاحه
قال عافونى احسن ده سر
نبهوا علينا نخبى
وكل شىء واجب وأمر
بعد مدة عرفت انه
اختاروه فى قوة خاصة
تدريباتهم صعبة جدا
حسيت انى باقرا قصة
ماكنتش اعرف فين مكانه
اللى يعرف بس أبويا
يكتب الجوابات عليها
كام رقم واشى سرايا
كان أمين على سر بلده
حاسس انه أقل واجب
لو دفع عمره فى سبيلها
مش مذبذب لا ده حابب
وأمى تدعيله ودعاها
كان بيحضن قلبنا
وهو راضى زى عادته
ويبتسم دايما لنا
عدت الايام بسرعه
لحد مالقينا الغفير
جى ينادى وقال لابويا
قال اللهم اخلفنا خير
بس أكتر شىء بهرنى
شىء حقيقى مايتوصفش
أبويا وأمى بصبر قالوا
الشهيد أبدا مامتش
بس حزن الدنيا كله
كان بيعصر قلبهم
مين أعز من الضنا
ومين كمان ده ابنهم
ولما تم النصر نزلت
من عيوننا دموعنا بحر
وقفت وسط اصحابى احكى
ع الشهيد وبكل فخر
والنهارده وبعد عمر
وبعد ماكبرت وفهمت
قولت احكى قصته
وأبقى بكتابتى شاركت
وأفتكر أخويا الشهيد
ساحة النقاش