صحيت من النوم النهارده تعبان قوووووى وحاسس بالوخم..استغربت،وبعد تعب وتفكير لقيت السبب فى كده..هو القعدة اليومية على الكرسى فى المكان اللى الكل بيتغمز ويتلمز عليه..لقيتنى مرهق قوى ورجحت ده للسهر برضه فى نفس المكان،وافتكرت ساعتها اللى قاعدين يلكوا و يسبوا ويلعنوا و يقولوا اشمعنى؟ساعتها تمنيت اكون زيهم بره المكان ده اللى كله ارهاق و تعب و حرق أعصاب،ودا رغم خفة الدم اللى فيه لكن ما باليد حيلة..المهم ساعتها افتكرت جملة حلوة قووووى  شفتها مكتوبة على عربية كارو الجملة كانت بتقول ( بيحسدونى عليكى وأنت سر عذابى)بعدها طلعت منى آآآآآآآآه كبيرة لدرجة إن الست جارتنا خبطتت عليه   ( وطبعا مش الرقاصة بتاعة الدور ال12 ) وسألتنى مالكم يا bo mima ؟ ساعتها ضحكت وقلت لها مفيش حاجة دا انا قاعد لوحدى ردت وقالت (والمدام والاولاد فين؟) قلت لها مسافرين..قالت مستغربة كانها سمعتنى بأقول كلام قبيح (يا ندامة و سايبنى واقفة اتكلم معاك لوحدنا) ضحكت قوووووى وقلت لها  لا متخفيش فى مش لوحدنا الشيطان متلقح على كرسى الأنتريه ،الغريبة إنها بعدتنى بإيديها وبصت جوه الشقة وقالت (هو فين؟؟؟  هو فين؟؟؟)قلت لها يبقى لازم خاف منك وهرب يا ام داليا،وبرضه ساعتها ضحكت وقلت بيحسدونى عليك وأنت سر عذابى..تتوقعوا الناس بتحسدنى على سكنى جار لأم داليا ليه؟؟اللى يعرف يا ريت يقول لى،وميقليش نفس الجملة (يا ابن المحظوظة..عيش يا معلم)