ما تفسير قول الحق تبارك وتعالى في سورة الرعد: إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنْفُسِهِمْ ؟؟؟
آية عظيمة تدل على أن الله تبارك وتعالى بكمال عدله وكمال حكمته لا يُغير ما بقوم من خير إلى شر، ومن شر إلى خير ومن رخاء إلى شدة، ومن شدة إلى رخاء حتى يغيروا ما بأنفسهم،
طبعا أحنا مش ممكن نتغيرفى يوم وليلة..يعني طريق التغيير لسه قدامه كتير عايز عزيمه واراده مناعشان نغير اخلاق شعب كامل دي رحلة عمل شاقة جدا..عشان نحارب الرشوة والتكاسل والفوضى والتواكل وكل الصفات السيئه اللي موجودة في بعضنا ده محتاج سنين ..يعني عشان كده انا لا اؤمن بكلمة "اخلاق ما بعد الثورة" هي كلمة ممكن تكون صحيحة لكن بعد سنين طويلة هتتحقق ومخطأ جدا من يظن ان الناس اتغيرت خلاص بدليل كمية السرقة والنهب والفوضى اللي بتحصل من ساعة الثورة..طبعا الثورة مش هي السبب في ده ولا هي اللي هتغير ده..لازم نتغير من جوانا
ولازم نسعي لده كويس جدا طوال السنين الجاية دي
أولا : هدف واحد يجمعنا :
أرى أن الهدف الواحد مهم وأساس للقوى عندما وجد الشباب هدف وقضيه حقيقية كانوا على استعداد للموت من اجلها وهذا يرتبط بالا راده القوية والعزيمة للتقدم وتحقيق الهدف كان كل واحد ماشي بطريقة يلا نفسي بدون مشروع يحطه الحاكم ويلتف حواليه المصريين جميعا لتحقيقه ..حلم بلد كاملة اننا نبقي ذي نمور اسيا مثلا ونتقدم ونحط مصر في مكانة عالية جدا ..ويؤتي ثماره حتي لو بعد كام سنة..
ثانيا: المحاسبة والمسئولية :
الاحساس بالمسئولية مش انك بتأدي وظيفتك وخلاص وأنت زهقان منها ..وده مش هيحصل طول ما الأجور الموجودة ضعيفة جدا لا تحقق حياة كريمة للفرد وفي نفس الوقت لازم كل واحد يعرف انه هيتحاسب طبعا عشان حتي لو مش حاسس بالمسئولية يخاف من العقاب
ثالثا : تغيير شامل للتعليم :
العملية التعليمية لازم تتغير بالكامل ..الكتب والمناهج والفصول وطريقة شرح المعلمين ومرتبات المعلمين ومنع الدروس الخصوصية وكل حاجة من الإلف للياء في العملية التعليمية لان هي دي اللي هتقوم عليها مصر في الفترة الجاية اكيدوكلنا يعلم أن اليابان تبنت العمل الجماعي لأنه يتفق وسياسة الدولة والزيادة السكانية العمل على تنبى تجارب تتناسب ومجتمعنا فى التعليم وغيرها من مجالات البحث العلمي لزرع روح الابداع والابتكار والتعاون لدى الأولاد من الصغر
رابعا : المشاركة الفعالة :
من الان لازم كله يشارك ويحط صوته ولازم فعلا تعرف أن صوتك أمانة في أي انتخابات أو استفتاء لان عصر الصناديق المتظبطة خلص خلاص ودلوقتي عصر جديد فيه بجد صوتك ليه قيمة ومسموع
خامسا : الاهتمام بجميع الأفكار :
العمل على أخذ كل الابتكارات والمقترحات ولاافكار فى الاعتبار اساتذه وبسطاء الجميع واحد ذي الباز مثلا أو محمود عمارة أو ممدوح حمزة و الدكتور زويل وكثير من أبناء مصر الناجحين فى الداخل والخارج عندهم كمية أفكار وغيرهم من الشباب ولم يجدوا أى اهتمام بأفكارهم لكن الآن لازم نهتم بفكرة كل شاب وكل عالم لكى نبنى مستقبل بلدنا ونضعها على الطريق
سادسا : تعميق الإحساس بالانتماء :
مما لا شك فيه أن المجتمع والنظام السابق خلق شباب لا يشعر بالانتماء لهذا البلد لأنه لم يشعر فيها ولا يجد اهتمام ولاعمل ولا مستقبل لكن الآن البلد أصبحت لنا بلدنا ولذا لابد من الشعور بالانتماء ونبنى بلدنا بافكرنا ومجهدنا
لازم نعرف تاريخ بلدهم ونعرف قيمها ونزرع في الجميع حب البلد والانتماء ليها تحت مقولة "متقولش إيه أديتنا مصر قول هتدي إيه لمصر" عشان نطلع جيل واعي ويقدر يدي بلده بإخلاص وتفاني
يبقى بالحب والسلام والانتماء والخير وبناء جيل يكون صرح لهذا البلد في المستقبل والتغيير فى كل مكان وإنسان وهدف حقيقي رفعه هذا الوطن يمكن أن نضع بلدنا على الطريق
بقلم
عبير الرملى
